PSG chelh tumtu Strasbourg

Ligue 1 hmahruaitu Paris Saint Germain chuan Pathianni zan dar 1:15-ah hian Strasbourg an hmachhawn dawn a, anmahnin hnaih bertu RC Lens te inkhel result hre chunga khel tur an nih avangin pressure an ngah sawt ang. Nizan khan Lens leh Le Havre te an inkhel a, an result kan hre hman lo.

Kar hmasa Ligue 1 khelhah hmahruaitu Lens an chak loh avangin pakhatnaah PSG an chho a, champion nawn leh an tum hle. An inthlauhna hi point hnih chauh a nih avangin PSG tan thlamuang taka awm a la hun lo thung.

PSG tan Lee Kang-In, Fabian Ruiz, Khvicha Kvaratskhelia te chu hliam vangin an inkhelh a rinawm loh a, anhmahni thlaktu an ṭhat avangin hlauhthawnna tur erawh a awm lo.

Achraf Hakimi chu AFCON a khelh hnuah a lo kir leh tawh a, AFCON-ah an ram champion pui thei lo mah se player pawimawh a ni a, goal nawr leh venhim kawngah a thawhhlawk thei hle. Hakimi awm loh chhunga a hmun ruak a lo hnawh khat ṭhin midfielder Warren Zaire-Emery khel chhe ngai lo mah se Hakimi lo kir hi PSG tan lawmna tham a ni.

Hetih lai hian PSG khingpui tur Strasbourg hi an manager Liam Rosenior-a'n Chelsea a pansan hnuah an buai phah lo a, league match pahnih an khelh tawhah an chak ve ve. Forward Joaquín Panichelli league-ah goal 11 khung tawhin Mason Greenwood chiah a tluk lo a, PSG tan Argentine forward hi zuam sual theih tur a ni.