Rodrygo-a'n ngaihdam a dil

Benfica laka an tlawm ṭuma red card hmu, Real Madrid forward Rodrygo chuan fan-te hnenah ngaihdam a dil a, a tihsual a pawm thu a sawi.

Real hian Champions League-a an match hnuhnung berah Benfica chu 4-2 in an ngam lo a, last 16 lut turin playoff an khelh a ngaih dawn phah.

He inkhelah hian Rodrygo hi referee laka mawi lo taka a chet avangin hun pek belh minute sarihnaah hnawhchhuah a ni a, a chhuah hnu lawkah Benfica-in chak nemnghehna goal an khung zui.

Rodrygo chuan, "Kan elpuiten hun an khawhral luia ka hriat avangin ka thinrim ka insum zo ta lo a, khatiang khan ka che ngai lo. Real tana ka khelh laiin red card ka la hmu ngai lo a, hnawhchhuah ka nihin a nghawng pawh ka hrethiam.

"Club ṭantu, ka khelhpui leh coach te hnenah ngaihdam ka dil a ni. Inlungrual taka thawk hoin, he club tan kan bei zel ang a, Champions League-ah pawh theihtawp kan chhuah zel ang," a ti.

Real Madrid-in coach thar Alvaro Arbeloa hnuaia match nga an khelhna niin, vawi thum an chak a, vawi hnih an tlawm tawh - an tlawm pahnih erawh a mualpho thlak!

Copa del Rey round of 16-a second division club Albacete (3-2) an ngam loh leh Benfica an ngam loh hi a ni a, Pathianni zan dar 6:30-ah league match khel turin Rayo Vallecano an lenchilh zui dawn.

Real hian tun dinhmunah point khat chauhin hmahruaitu Barcelona an phak lo mek a, champion tum tan chetsual loh hun tak a ni - Barca hian zanin dar 1:30-ah Elche an lenchilh thung ang.

Madrid khaw club-in UCL knockout playoff an khelh dawn laiin, Barca erawh last 16 an lut fel der tawh a, an league match hnuhnung berah Copenhagen chu 4-1 in an sawp - match khelh tur tam tak kara playoff khelh ngai lo hi club tan chanchin lawmawm a ni.