Mizoramah WBC Asia title fight awm dawn

Grassroot Boxing Promotions leh Crown Boxing promotions ṭang kawp chuan professional boxing event 'King of The Hills', chu May 1, 2026 hian an buatsaih dawn - Mizoram boxing-ah chuan title fight langsar ber tur a ni.

R. Dengṭhuama Indoor Stadium-a neih turah hian F.Zoramchhana chuan WBC Asia title fight a hmachhawn dawn a, 'The Animal' hming lem an pek Vanlalawmpuia a inlan dawn bawk - inhnek hi Zonet chuan en theih turin a pe chhuak ang.

He event-ah hian bout 16 awm tura ruahman an ni a, Grassroot Boxing Promotions-a an houtpa Mujtaba Kamal chuan,"He event hi chu ṭum dang zawng aiin a pui dawn a, WBC Asia title fight a awm dawn avangin ram dang mi pawhin an ngaihven zual a, Mizo mipuite pawh min support turin ka sawm nghal bawk che u," a ti.

'King of the Hills'-ah hian F. Zoramchhana hmachhawn tur tihchian a la ni lo a, French boxer pakhat an dawr mek thu Mujtaba Kamal chuan a sawi - fighter ṭha tak Mizoram mipui hmaah chhawp an tum.

Zotea chuan, "WBC Asia title fight hi ka tan chuan fight lian ber tur a ni a, ka huphurhna aiin ka phurna a sang zawk," tiin Vanglaini a hrilh a, "Pathian zarah ka champion thei a nih chuan world champion nih ka thlir leh ang," a ti a, beiseina sang tak a nei.

Cherhlun tlangval Zotea bakah Vanlalawmpuia a inlan dawn a, Khuangthing tlangval hian nikum

November-a Super Fighter Series, Bangalore-a neih zawh taka a hneh Uganda boxer Kagiumu Ivan Kigga nen rematch a chak thu a sawi - Kigga a hneh ṭum hian unanimous decision-in a chak.

Opa chuan,"Nikuma kan inhnek khan chak zawkah ṭang mah ila Kagiumu Ivan Kigga kha a lungawi lo a, promoter te bulah a chak zawk thu sawiin a lo sawisel a ni awm a, engmah sawiselna awm lo turin chiang taka knock out ka duh a, kan ram leilung ngeia khel tur kan nih avangin Mizo mipuite min ṭawiawm turin ka sawm bawk a ni," tiin Uganda boxer chu a tum chak ber a nih thu a sawi.

Zotea leh Opa bakah hian WBC Youth Bantamweight Title kawl mektu Laldinsanga Ramlawt chu inlan thei dinhmunah a ding a, he thu buatsaih a nih lai hian sawi chian theih a la ni lo thung.

Mujtaba Kamal chuan, "Dinsanga hian Police training a neih avangin a tel dawn em, tih kan sawi chiang thei lo a, a theih hram chuan kar hnih vel chawlh laa fight nei turin hma kan la bawk," a ti - Dinsanga hi Mizo mipui tam takin hmuh an châk ang.