Bayern Munich-in Kane chelh tum

German champion Bayern Munich chuan an striker chhuanvawr Harry Kane chu contract thar ziahpui an duh a, club sporting director Max Eberl chuan English striker chu contract thar chungchangah an dawr mek thu a sawi.

Kum 32 mi Kane hian August 2023 khan Bayern hi pound maktaduai 86.4-in a zawm a, kum li atan contract a ziak. Kum 2027 nipui thleng bak German club-ah hian contract a nei tawh lo tihna a ni a, Premier League lama kir tur anga sawi a awm fo bawk.

Mahse, Eberl chuan, "Harry Kan dawr tawh a, inbiakna a kal mek. Thutlukna kan siam a ngai tih chu kan hre tlang vek a ni," a ti a, England captain chu chân mai an tum lo hle.

Kane hian Bayern tan inelna hrang hrangah match 126 khel tawhin goal 119 a khungsak a, assist vawi 30 a nei. Tun season bikah match 30 khelin goal 34 ngawt a khung tawh.

Bayern hian nizan khan Champions League match an khel a, he thuziak i chhiar meuh chuan Kane-a goal khung zat hi a danglam leh tawh mai thei. Bundesliga bikah tun season-ah match 19 khelin goal 21 a khung tawh!

Kane hian Bayern striker hlui Robert Lewandowski-a'n season khata league goal 41 a lo khung tawh record chu khum a tum dawn a, tuna a goal khung dan ngaihtuah chuan a khum theih mai pawh a rinawm.

Bayern chief executive Jan-Christian Dreesen chuan, "Harry hian min ringtawk a, Munich-a awm hi nuam a ti hle. Amah mai bakah a chhungte pawhin nuam an ti a, chuvangin hmanhmawh chung kan mamawh hran lo," a ti.

Kane hian Tottenham Hotspur a chhuahsan hma khan, league match 320-ah goal 213 a khung hman a, Premier League-a goal khung hnem ber record chelhtu Alan Shearer (260 goals) chiah a tluk lo.

Hei vang hian EPL-a goal khung tam record siam tura a kir leh châk ringtu an tam hle. Mahse, nikum October khan, amah ngei pawhin Bayern-a hun hman zel a duh thu sawiin, "Premier League-a kir leh ka châkna pawh a tlahniam ve ta deuh," a ti hial.