Villa-ah Abraham a kir

Tammy Abraham chuan Turkish Super Lig club Besiktas chhuahsanin Aston Villa a zawm a, a man zat hi pound maktaduai 18.25 niin, kum li leh a chanve chhung atan contract a ziak.

Chelsea player a nih laia Villa-a loan-a lo khel tawh Abrahram hian kum 2021 khan Blues chhuahsanin, AS Roma chu £34mtd-in a zawm a, match 53-ah goal 27 khungin, Europa Conference League a champion pui nghal.

Mahse, a season hnihnaah match 54 khelin goal kua chiah a khung a, season tawpah inhliam zuiin, thla 10 zet a chawl. Abraham hian a dam hnuah Roma tan match 12 khelin goal khat chiah a khung a, amah latu Jose Mourinho chhuah hnuah AC Milan chu loan-in a zawm zui.

Milan tan match 44 khela goal 10 a khung hnuah Roma-ah a kir a, Besiktas-ah loan-in a kal zui. Turkish club hian £11mtd-a lei theihna dan an neih chu tinungin an lei a, Villa hnenah £18.25mtd-in an hralh zui leh ta a ni.

Besiktas tan hian match 26-ah goal 13 a khung hman a, English striker chuan, "Goal khungin, chona tam tak ka lo hmachhawn tawh a, player leh mihring mihrinna kawngah pawh hma ka sawn hle.

"Villa-ah hian ka theihna zawng zawng hlan turin ka lo kir a ni," a ti. Unai Emery enkawl Villa hian an player hlui, Juventus aṭanga Nottingham Forest-a loan-a khel mek Douglas Luiz pawh loan-in an la kir dawn.