A thiam pali zingah Sinner

Australiam Open hattrick siam turin Jannik Sinner chuan kawng dik a zawh zel - nimin khan quarterfinal-ah Ben Shelton chu straight set-in a hneh a, semifinal-a Novak Djokovic hmachhawn turin a inhlap kai.

Ben Shelton tan Sinner a sang hret a, kum zawna Australian Open champion tawh Sinner hian 6-3 6-4 6-4 in hnehna a chang - kum 2024 leh 2025 khan nomawi a lo chawi tawh a, a zawna vawi thum champion tumin a thiam pali zingah a tel leh ta.

Kum 23 mi Shelton hian Australian Open-ah hun duhawm tak hmangin, quarterfinal a luhna kalkawngah vawi khat chiah set hloh a nei. Mahse, Sinner a tawn meuh chuan set lak nei loin a tlawm.

Rod Laver Arena-a hnehna chang turin Sinner hian darkar hnih leh minute 23 bak a mamawh lo. Shelton lakah serve hloh nei miah loin a chak a, Open Era-a Grand Slam semifinal a zawna vawi ruk lut thei zingah a hming a ziak kai - Ivan Lendl, Roger Federer, Novak Djokovic leh Rafael Nadal te kiangah a hming ziah a ni ve ta.

Sinner-a'n harsatna tawk lo mah se, a khingpui erawh a fak thiam hle. Kum 23 mi tennis star chuan, "Ben-a hmachhawn hi chu a harsa ṭhin hle. A serve a ṭha em em zel a, kum tinin a hmasawnna hmuh tur a awm zel ni berin ka hria," a ti - Sinner hi AO-ah match 19 zet chu a zawnin a chak tawh!

Italian tlangval chuan a khelh dana a lawm thu sawi zuiin, "A nihna dik takah chuan, chawlh vang vang hnua han inkhelh leh hi chuan, player-ten engtiang takin nge min rawn hmachhawn dawn hriatthiam a har ṭhin a, vawiina ka khelh danah ka lawm hle a ni," a ti a, Shelton a hmachhawn danah a lawm.

Sinner hian Australian Open nomawi vawi hnih a lo chawi tawh bakah Wimbledon leh US Open-ah vawi khat ve ve a lo champion tawh bawk a, French Open erawh nikum khan final lut mah se, a champion zo lo ta thung.

Kum 23 mi Shelton erawh hmabak nei êng tak ni mah se, Grand Slam a la champion ngai lo - US Open leh Australian Open-ah semifinal vawi khat ve ve a lut tawh a, French Open-a a thlen san ber chu fourth round niin, Wimbledon-ah quarterfinal a thleng tawh bawk.