Man City mikhual tur Galatasaray

Manchester City chuan zanin dar 1:30 hian Champions League-ah Galatasaray an mikhual dawn. Pep Guardiola hote hian knockout playoff lut chiang tawh mah se last 16 luh beiseina nei turin chak ngei a ṭul. City hian Turkish club hi hneh pawh ni se, an chunga awmte result a zirin knockout playoff an khelh tho a ṭul thei bawk.

Season liam ta khan Man City hi table-ah 22-na an ni pha chauh a, knockout playoff lut pha mah se seeded an ni lo. Pep-a hote hian knockout playoff-ah Real Madrid an hmachhawn a, last 16 an thleng pha lo. Kuminah erawh City hian knockout playoff an khel a nih pawhin seeded an nih a rinawm a, an khingpui an nem hret tawh turah ngaih a ni.

Chutihrualin last 16 an lut nghal lo a nih chuan February thlaah match hnih an neih belh dawn a, Premier League-a an elpui Arsenal aia match hniha an khelh tam dawn avangin hmabak a harsat phah dawn. Season liam ta khan City-in nomawi an chawi lo a, kuminah nomawi pali la beisei thei mah se 'nil' thei dinhmunah an ding tho bawk.

Man City-in UCL-a an match hnuhnung berah Bodo/Glimt an hneh lo a, kartawp Premier League-ah Erling Haaland leh Phil Foden te dah ṭhain Wolves 2-0 in an hneh. City tana chanchin lawmawm chu defender thar Marc Guéhi a rintlak a, clean sheet an nei nghal.

Tlarhma lamah Omar Marmoush leh player thar Antoine Semenyo ten goal an khung a, tun hnaia goal khung harsat Haaland pawh bench lama awm thei dinhmunah a ding. Chutihrualin Norwegian club an hneh loh ṭuma hnawhchhuah Rodri a khel thei dawn lo a, Spanish midfielder hmunruak hnawh khah a harsa ang.

City khingpui tur Galatasaray hi table-ah 17-naah an awm mek a, point 10 chauh an la hmuh avangin an chak lo a nih chuan tla nghal thei dinhmunah an ding. Turkish club tan thih leh dam inkar a nih dawn avangin thapui chhuah a ṭul dawn a, City tan khelh an harsa dawn.

Galatasaray hian Premier League club an hmachhawn hnuhnung paliah hneh loh an tawng lo a, kum 2023 khan Erik Ten Hag-a enkawl Manchester United chu group stage aṭangin an pet chhuak. Season liam ta khan Europa League-ah Tottenham 3-2 in an hneh a, kumin Champions League-ah Victor Osimhen goal hmangin Liverpool 1-0 in an hneh.

Turkish club assistant manager Ismael Garcia Gomez chuan, "Turkish league hi England pawn lamah chuan English player tamna ber a ni a, hei vang hian English club hi kan hrechiang. Premier League nena khaikhin tur chu kan ni lo a, mah se Europe-a league dang aiin Premier League kan ang teuh zawk," tiin a sawi a, Turkish league-a game a ran ve tho thu a sawi lang bawk.

Okan Buruk-a kaihhruai Galatasaray hi Super Lig-ah pakhatnaah an awm mek a; Premier League-a tawnhriat nei ṭha Leroy Sane leh Wilfried Zaha bakah European football-a tawnhriat nei ṭha Victor Osimhen leh Mauro Icardi te an awm avangin City tan fimkhur a ṭul ang.