Palace khelmualah Chelsea an chak

Chelsea head coach Liam Rosenior-a'n Blues a enkawl hnuah London club-in hma an sawn zel a, league match hnih a kaihhruai tawhah hnehna a chanpui ve ve.

Blues hian Pathianni zan khan khualmualah Crystal Palace an lenchilh a, 3-1 in an chak. Blues tan Estêvão Willian, Joao Pedro leh Enzo Fernandez (penalty) ten goal khat ṭheuh an khung.

Palace tana Chris Richards-a goal khung chu scoreline cheimawina bak a tling zo lo a, minute 72-naah Adam Wharton hnawhchhuah a nih bawk avangin Palace tan comeback a harsa tawh.

November hnua a vawi khat nan Chelsea-in league match hnih chhung a zawnin hnehna an chang ve leh ta a, table-ah panganaah invawrh chhoin, season thara Champions League khelh beiseina a la nung.

Tuarna pawh hlawkna

Chelsea-in hliam vangin goal khung khawl Cole Palmer an la chhawr thei lo a, mahse, a hmun ruak luah turin rawlthar duhawm Estevao Willian an nei a, 'tuarna pawh hlawkna' an ti!

Mualneitu Palace zawk hi goal khung thei dinhmunah an ding a, mahse, Aston Villa leh Juventus nena sawi zawm, striker Jean‑Philippe Mateta chuan Robert Sanchez chiah a hmachhawn chungin a chance neih a chhawr lo.

Blues tan Enzo leh Moisés Caicedo te pawhin chance an nei ve tho a, mahse, an chhawr bik lo! Senegal tanaa AFCON nomawi chawi hlim, Palace winger Ismaila Sarr pawhin a chance neih a chhawr chuang lo a, 0-0 a ni zel.

Mahse, minute 34-naah Estevao a inlar. Kum 18 mi forward hian Jaydee Canvot-a chetsual nangchingin, amah vengtu Tyrick Mitchell chu duhthalin a tlansan a, goal hmahruai ṭha zetin a khung.

Ennawm hmuhnawm

First half-ah beisei angin inkhel nung lo mah se, second half erawh a hmuhnawm ta. Minute 50-naah Blues bawkin an khung a, Estêvão-a'n Joao Pedro tana a siamsak chu Brazilian forward hian harsatna nei loin goal-ah a lo chantir.

Minute 14 a liam a, Chelsea bawk an inlar - an goal hnihna khungtu Pedro-a ball pet chuan Palace centre back Jaydee Canvot-a kut a fuh a, rei tak VAR hmanga ennawn a nih hnuah referee-in penalty spot a kawk.

Penalty pet turin Enzo a lo pen chhuak a, harsatna nei loin goal-ah a chantir nghal. Palace manganna belhchhah turin midfielder Wharton chuan minute 72-naah a yellow card pahnihna a hmu a, hnawhchhuah a ni.

Player kim loa an khelh hnuah Palace-in khung belh mah se, awmzia a nei thui lo a, Chelsea-in an mikhualna ramah 3-1 in hnehna an chang a, Rosenior hoin hmalam an pan zel e.