India chakna Abhishek

India leh New Zealand chuan Nilaini zan khan T20 match nga khelh tura hmasa ber an khel a, Men in Blue-in 48 runs-in hnehna an chang. Zanin dar 7:00 hian Shaheed Veer Narayan Singh International Cricket Stadium, New Raipur-ah match hnihna an khel ang .

Vidarbha Cricket Association Stadium, Jamtha-ah New Zealand-in vawm hmasak an thlang. India opener Abhishek Sharma-a'n T20 batting ranking-a no. 1 a nih chhan lantirin ball 35 lekah 84 runs a siam.

Kum 25 mi Abhishek hian six runs vawi riat bakah four vawi nga a vaw chhuak a, dinhmun ṭhaah India a dah. Abhishek hi Amritsar, Punjab-a piang a ni a, kum 2024 aṭangin India tan a khel ṭan a, T20 World Cup awm turah pawh Men in Blue innghahna tur a ni.

Captain Suryakumar Yadav (32), Rinku Singh (44*) leh Hardik Pandya (25) ten Abhishek hi rawn thlawp ve bawkin India-in over 20-ah 238/7 runs an siam a, New Zealand tan a tam mah mah.

Black Caps opener Devon Conway (0) leh Tim Robinson (21) te an che ṭha tawk lo a, Rachin Ravindra pawhin run khat chauh a siam. Glenn Phillips-a'n ball 40 leka 78 runs a siam zarah New Zealand-in beiseina tlem rawn nei mah se a tawp lam boruak a tinung pha lo.

New Zealand hian over 20-ah 190/7 runs chauh an siam a, India-in 48 runs-in hnehna an chang. Black Caps hian ODI-ah 2-1 in hnehna an chang tawh a, T20 series-ah pawh mualneitu hi hneh nawn leh ngei an tum ang.