Forest tlawh tur Arsenal

Arsenal-in zanin dar 11:00 hian City Ground-ah Nottingham Forest an hmachhawn dawn. Mikel Arteta hote hian Forest hi nikum September thla khan Emirates Stadium-ah 3-0 in an sawp tawh a, table-a 17-na lakah hian point thum an hlawh chhuak lo a nih chuan an thinur ang.

Gunners hian Premier League-ah a zawna vawi nga an chak hnuin an match hnuhnung berah Liverpool nen an inhnehtawk. Arteta hote point hloh ve thei an ni a, chutihrualin kar laihawlah Chelsea an hneh avangin inrintawkna an ngah sawt ang.

League Cup semifinal first leg-ah Viktor Gyökeres-a'n goal a khung a, Swedish striker hi Premier League-ah Leandro Trossard nen goal nga ve ve khungin club top scorer an ni mek. Gunners hian goal khungtu bik an nei lo chungin league hmahruaitu an ni thei a, an champion thei ang em tih hi zawhna awm chu a ni.

Premier League champion tawh zingah goal 10 khung tling player pakhat tal an la awm vek a, Arsenal hi a duhawm lo zawnga record thaichhe thei dinhmunah an ding. Pound maktaduai 64 man Gyokeres-a'n beisei a pha lo a, Spotirng Lisbon-ah match 102 khelin goal 97 khung mah se Gunners tan inelna hrang hrangah match 25 aṭangin goal riat chiah a la khung.

Chutihrualin Arsenal tana chanchin lawmawm chu goal khungtu bik an nei lo chungin tun season Premier League-ah goal 40 an khung tawh a, goal khung tam lamah Man City (45) chauh an tluk lo. Tlarhnung lam pawh a phui ṭha a, Arsenal hi Premier League-a goal chhuah tlem ber niin goal 14 chauh an la chhuah.

Gunners hmachhawn tur Nottingham Forest hian League Cup-ah Championship club Wrexham hneh loin an tla a, Premier League match hnuhnung berah West Ham United hneh ve mah se hemi match liah an chak lo vek. Forest hian tun season-ah manager pahnih Nuno Espírito Santo leh Ange Postecoglou te an ban tawh a, result ṭha an neih loh avangin tuna enkawltu Sean Dyche dinhmun pawh a ṭha chuang lo.