Gallagher-a'n Spurs zawm

Atletico Madrid midfielder Conor Gallagher chuan Tottenham Hotspur a zawm a, London club hian England international lakluh nan hian pound maktaduai 35 an seng.

Spurs bakah Aston Villa chuan kum 25 mi midfielder hi an rim ve bawk a, Unai Emery-a team-te beisei phak baka an che ṭha chungin Spurs an ngam ta lo - Chelsea player hlui Gallagher hian kum 2031 thleng atan Spurs-ah hian contract a ziak.

Chelsea academy chhuak Gallagher hian kum 2024 khan Blues chhuahsanin, Atletico Madrid chu £33mtd-in a zawm a, a season hmasa berah player pawimawh ni mah se, tun season-ah a beisei angin hmun a chang tam tawk lo.

Kum 25 mi midfielder hian a tawpah chuan thutlukna pawimawh siamin, England lamah a kir leh ta. Gallagher chuan, "Spurs ka zawm thei hi ka hlimin ka lawm em em a, club ropui takah hmasawn turin ka lut a ni," a ti.

Gallagher chuan sawi zawmin, "He club-a fan-te ṭhatzia ka hria a, anni nena hriat reng tur hun duhawm kan tawn ho ka beisei," a ti a, amah chher liantu Blues hmelma kumhlun Spurs-ah hming chher a tum dawn.

England tana vawi 22 inlan tawh Gallagher hian a inkhelh tam loh avangin an ram team-ah pawh hmun a chang tam ta meuh lo a, tuna Three Lions coach Thomas Tuchel hnuaiah hian vawi khat chiah la khelin, minute 59 khelmualah hun a hmang.

Tuchel-a hnuaia a inlan chhun pawh friendly match niin, Senegal lakah 3-1 in an tlawm. London lamah a puanthuah a tel a, World Cup-a England squad-ah tel a beisei ang.

Spurs boss Thomas Frank chuan, "Conor hi top midfielder a ni a, kan hnena a rawn kal theih nan hian kan thawkrim hle. Conor hi team captain pawh lo ni tawh ṭhin a ni a, dressing room-ah mi puitling, mize ṭha leh hruaitu ṭha kan neih belh dawn tihna a ni.

"Chu mai a ni lo - a tlan theihna, a goal nawr na tak leh goal thawhchhuah duha a tuihalnate hian nasa takin hma min sawnpui dawn a ni," a ti a, Gallagher an chang thei chu a lawm hle.

Spurs hian kar hmasa lawk khan hliam vangin midfielder Rodrigo Bentancur an chân a, thla thum lai a chawlh dawn avangin midfielder an zawng nghal a, Gallagher an chang ta.