Zahna kawna leng Real Madrid

Real Madrid-in an coach Xabi Alonso duhkhawp loin an ban a, Spanish coach an ban hnua an match hmasa berah an chak lo nghal - Real-in an ngam loh hi second division club Albacete an ni.

Copa del Rey round of 16-ah Real hian coach thar Alvaro Arbeloa hoin Albacete an lenchilh a, 3-2 in an tlawm! Madrid khaw club hi vawi hnih ngawt si phurh suttu zawkah an ṭang a, a tawp bera an goal chhuah erawh an sut ta lo.

Albacate hian Javi Villar leh Jefté Betancor hmangin vawi hnih ngawt hma an hruai a, Real tan Franco Mastantuono leh Gonzalo Garcia ten si phurh an sut ve ve - Garcia-a'n si phurh a sut hian hun pek belh a ni tawh.

Mahse, mualneitu Albacate-in extra time khelh kher ngai loa chak an tum tih an pholang a, hun pek belh minute linaah Betancor chuan chakna goal a khung - Real an tla a, an mualpho takzet.

Mangṭha Xabi

Real-in ropui taka Bayer Leverkusen lo kaihruai tawhtu Xabi Alonso chu German club aṭangin seng lut mah se, an dawhtheihnain thla riat pawh a tlin lo a, Thawhṭanni khan an inṭhen.

Madrid khaw club hian coach turin Alonso ṭhianpa, Liverpool leh Real-a a khelhpui ṭhin Alvaro Arbeloa an ruai a, mahse, Real reserve team manager aṭanga promotion hmu coach hian a hna hmasa ber a hlen lo.

Arbeloa-a'n Albacete a dah sang lo tih a chiang a, Spanish second division club lakah Kylian Mbappe, Rodrygo, Thibaut Courtois leh Jude Bellingham te chu a hahdamtir a, heti chung hian second division club laka tlawm tur erawh an ni lo tih a chiang.

Real tana bul ṭantu zingah Alonso duh lotu langsar Vinícius Júnior a tel a, Dean Huijsen, Federico Valverde leh Arda Güler ten bul an ṭan bawk a, Albacete tan chuan la ṭha tak an ni.

Mahse maw...

Real-in beisei ang ngeiin inkhel pawh an thunun a, second division club an bet. Mahse, Arbeloa hnuaia an match hmasa berah Real-in goal khung an harsat a, a tawpah chuan a chhuahtu hmasa zawkah an ṭang.

Minute 42-naah defender Javi Villar chuan Jose Lazo-a corner pet aṭanga ball kal chu a tauh lut a, rin loh zawkin hma an hruai! Mahse, Albacete hmahruai chhung erawh a rei bik lo.

First half hun pek belh minute thumnaah Mastantuono inlarin, Real tan si phurh a sut a, 1-1 a chawlhlawk hman zui niin, Real fan-ten hlauthawnna chang an la hre lo.

Barakhaih!

Mahse, football mawina chu beisei loh thil a thleng fo ṭhin hi a ni - player man tam rual kawl chungin Real an chungnung hleithei lo a, Arbeloa-a'n bench lama a dah ṭhat David Alaba, Eduardo Camavinga leh Daniel Carvajal te a luhtir.

Danglamna siamtu erawh Real bench aṭanga lutte ni loin Albacete lam substitution a ni thung - bench aṭanga luhtir Jefte Betancor chuan minute 82-naah hmahruai nawnna goal a khung a, hei hi hun pek belh minute khatnaah Gonzalo Garcia chuan a chhanglet ve leh thung.

Real hlim chhung erawh rei lo tak a ni - minute thum hnu lawkah Betancor chuan a goal hnihna khungin, Real laka a vawi khat nan Albacete a chakpui a, Madrid khaw club-in nomawi pakhat chu an thlauh leh ta.

Arbeloa-a'n Real a enkawl hmasak berah a chakpui zo lo a ni mai lo a, second division club lakah a tlawmpui - hmabak a ko ta hle.