Semifinal mangchhia a reh hnai?

Arsenal hi Mikel Arteta hnuaiah semifinal-ah an vanduai leh ṭhin a, League Cup semifinal hmangin semifinal mangchhia nuai reh an tum ang. Semifinal second leg hi Emirates Stadium-ah February 3, Thawhlehni zan dar 1:30-ah khelh a ni dawn a, hemi hma hian Gunners-in Nottingham Forest, Inter Milan, Manchester United, Kairat leh Leeds United te an hmachhawn ang.

Spanish manager Arteta-a'n Gunners a enkawl ṭantirh khan 2020 FA Cup semifinal-ah Manchester City an hneh a, nomawi an chawi zui bawk. Mahse, hemi hnu hian semifinal ṭum li thleng leh mah se an chak lo vek.

Kum 2021 khan Europa League semifinal-ah Villarreal an hneh lo a, kum 2022 khan League Cup semifinal-ah Liverpool lakah an tlawm. Season liam ta khan League Cup leh Champions League-ah semifinal lut ve ve mah se Newcastle leh PSG hneh loin an tlawm.

Tun season-ah erawh Arsenal-in Premier League leh Champions League-a hma an hruai bakah League Cup leh FA Cup-ah an la dam. Mikel Arteta-a'n Chelsea a hmachhawn match hnuhnung pariatah tlawm a nei lo a, second leg an muala an khelh dawn avangin an dinhmun a ṭha hle.

Spanish manager Arteta chuan, "Team ṭha tak lakah ṭha takin kan khel a, ka naute ka fak duh. Khelmual chhungah kan theihna sang tak kan lantir avangin 3-1 in inkhel kha a tawp turah ka ngai. Chu chauh ni loin goal lina khung theihna ṭha ṭum hnih kan nei bawk. Goal khung belh emaw chhuah lo ilang chuan inkhel kalhmang a danglam daih ang," tiin a naute khelh danah lawm mah se Chelsea-in beiseina an la nei chu pawi a tih thu a sawi.