ISL club-ten player hlawh tihhniam duh

Indian Super League club-te chuan an player-te hlawh tihhniam tumin hma an la a, he thu buatsaih a nih lai hian ISL club 14 zinga pathumte chuan hlawh tihhniam chungchangah an player-te an dawr tawh.

ISL hi All India Football Federation leh Football Sports Development Limited (FSDL) te thawh hona a tawp tak avangin rei tak chu khelh theih lohin chawlh a ni a, tun hnai khan AIFF chuan February 14 aṭanga khelh ṭan tur a nih tur thu a puang.

Mahse, season dang angin ISL hi khelh theih a ni dawn lo. AIFF-in commercial partner tur a zawn hmuh rih loh avangin AIFF hian a sum engemaw zat chu ISL huaihawt nan hian a hmang dawn a, ISL club-te pawh vaibelchhe khat ṭheuh chawi tura tih an ni.

Hetiang a nih avang hian ISL club tan sum beiseina tur a tlem sawt a, hei hian player hlawh a nghawng lo thei lo. Hlawh tam zawk beiseia ISL luhchilh foreigner tam tak pawhin India an chhuahsan mek.

Bengaluru FC neitu Parth Jindal chuan social media katlangin player-te chu hlawh tihniam tura ngenna a tichhuak hial tawh a, hei vang hian club tam zawkin an player-te hlawh tihhniam an tum ang tih a chiang.

JSW group neitu zinga mi Jindal chuan, "Kan dinhmun avanga sum lama club-te buaina hrethiam a, player-te pawh an inphah hniam theih ka beisei," a ti a, hlawh tihhniam a tum.

Season hmasaah te kha chuan ISL hian broadcasting deal aṭang ringawt pawhin vaibelchhe 275 an hmu a, hei hi khatihlaia ISL club 13-te chuan an insem.

Mahse, tunah chuan commercial partner an neih loh miau avangin broadcasting rights aṭanga sum hmuh tur ISL club-ten an nei lo nghal pang a, hei hian sum lamah harsatna nasa tak a thlen dawn tih a chiang.

ISL club te hian player hlawhah kum khat atan vaibelchhe 18 aia tam an seng thei lo a, hei hian player pahnih a huam lo thung–heng player-te hi chu an duh zat zat hlawh an pe thei.

Mahse, ISL-a player-te hlawh ngaihtuahin, club-ten he dan hi an zawm lo tih chu thil chiang a ni a, Indian player ṭha pangngai chuan season khatah vaibelchhe khat an hlawh kai deuh vek.

Hei vang hian ISL club ṭhenkhat chuan an player, season khata vaibelchhe khat hlawh kai chinte chu 20-25% a an hlawh tihniam turin an ngen a, vaibelchhe khat hnuai lam hlawhte chu 10-15% tala tihniam turin an ngen.

ISL club-ten season khata player hlawh atana an sen hi club budget aṭanga 70% vel a ni tlangpui a, an ngen anga player-ten hlawh tihhniam an rem tih chuan ISL club tam tak tan chuan thawk huaina tham a tling ang.