Martinelli-a'n ngaihdam a dil

Arsenal leh Liverpool inkhel hun pek belhah beisei loh thil a thleng a, Liverpool right back Conor Bradley chu hliam vangin a tlu - Arsenal forward Gabriel Martinelli chuan Bradley hi ball-a a vawm hnuah, pawn lamah nam chhuah a tum.

Martinelli chet dan avangin buaina tenau a chhuak a, Bradley chhantu Ibrahima Konate nen yellow card pek an ni. Martinelli hian Bradley hi hun khawhralah a ngai a, mahse, a lo inhliam tak tak si a ni!

Manchester United legend Gary Neville chuan, "Thil zahthlak tak a ni," tiin Martinelli chet dan a sawisel a, Roy Keane chuan, "Mimawl," tiin a sawi hial.

Hetihlai hian Martinelli chuan ngaihdam dil zuiin, "Boruak a sang tawh si a, a inhliam na tih ka hre lo a ni. Ka chet dan avangin ngaihdam ka dil a, Conor pawh a dam leh thuai ka duhsak a ni," a ti.

Liverpool boss Arne Slot chuan Martinelli chu chhanin, "Martinelli hi ka hrechiang lo a, mahse, pa ṭha tak a niin ka hria. Football-ah hian hun khawhral luih a tam em em a, goal khung duh tawh sia chutiang a thlen chuan a thinrim thlak ṭhin.

"Martinelli pawhin khatiang turah khan a ngai a ni mai a, minute 94-na a nih tawh avangin rilru fim put a har tawh ang," a ti a, a dem lo.

Liverpool hian Thawhṭanni zan dar 1:15-ah FA Cup third round khel turin Barnsley an mikhual dawn a, Arsenal hian Pathianni zan dar 7:30-ah Portsmouth an lenchilh thung ang.