Barca-in Spanish Super Cup final an lut

Spanish Super Cup semifinal-ah Barcelona chuan Athletic Bilbao 5-0 a sawpin final an lut. Catalan club hian final-ah nizana Real Madrid leh Atletico Madrid inkhela chak zawk an hmachhawn ang.

Barca tan Raphinha-a'n goal hnih khungin Ferran Torres, Fermín López leh Roony Bardghji ten goal khat ṭheuh an khung. Nomawi inchuhna hi January 10, Inrinni zan dar 12:30 hian King Abdullah Sports City Stadium, Jeddah-a khelh a ni ang.

Goal thum phawt

Super Cup hi Saudi Arabia-ah khelh a ni a, Alinma Bank Stadium-ah ṭan aṭangin Barca an chungnung zawk a, game hmuhnawm tak pho chhuakin chance pawh an nei nghal.

Spanish Super Cup vawi 15 chawi tawh Barca tan minute 22-naah Fermin Lopez ball pet lo la fuhtu Ferran Torres chuan hnai tak aṭangin hmahruaina goal a khung a, Saudi Arabia-ah pawh Barca fans te thawm a ṭha hle.

Minute 30-naah Raphinha ball cross chu vengtu nei lo Fermin Lopez chuan chiang takin a khung a, Barca-in goal hnihin hma an hruai. Bilbao keeper Unai Simon tan dan ngaihna a awm lo.

Catalan club tan Roony Bardghji chuan minute 34-naah a pet goal ve leh. Swedish winger hian Bilbao left back Adama Boiro a bum hnuah goal-ah a pet a, Unai Simon-a'n dang per zo loin Barca-in an goal thumna an khung.

Raphinha goal 2

Barca an phur laklawh a, an goal thumna an khung aṭanga minute li lekah Raphinha chuan goal a khung. Brazilian winger Raphinha chuan vei lam sir aṭanga ball la lutin angle zim takah kawh zetin a pet lut.

Bilbao-in chance an nei meuh lo a, chutihrualin Oihan Sancet-a'n goal ban tih perin goal a khung teuh hle. Halftime-ah 4-0 a ni a, second half-ah erawh goal khat chauh a luh belh tawh.

Second half ṭan a nih hnuah pawh Barca tho a chungung zawkah an ṭang a, inkhel an thunun hneh hle. Athletic Bilbao erawh a bet zawkah an ṭang tluan.

Minute 51-naah buai nuai nuai karah Raphinha lo langin, Brazilian winger hian a mimal goal hnihna leh team goal ngana ni turin chiang takin goal kilah tak a pet goal.

Subsitute aṭangin Marcus Rashford leh Lamine Yamal te luhtir ni mah se goal dang a luh belh tawh lo a, harsatna tawk loin Barca in final an lut. Nomawi inchuhna a hmuhnawm dawn. Real Madrid-in Atletico an hneh a nih chuan El Clasico a hmuh theih dawn a, a thleng ta lo a nih pawhin Barca leh Diego Simeone enkawl Atletico inkhel tur chu en châkawm tak a ni tho.