A chung berah Inter awm chhunzawm zel

Nilaini Zan Serie A inkhelah Inter Milan chuan an mikhualna ramah Parma 2-0 in an hneh a, table-ah pakhatnaah awm chhunzawm zelin, an hnuai chiaha awm an hmelma club AC Milan aiin point liin an sang zawk.

Inter bakah hian AS Roma, Atalanta leh Juventus te chuan an khingpuite an hneh vek a, Napoli erawh an mikhual Verona nen an inhnehtawk.

Inter Milan-in ball chang tam zawkin, inkhel thunun zawk mah se Parma lamin an chance neih chhun an khung teuh thei hle. Inter insiamremin chance an insiam nghal nual a, goal erawh an khung nghal lo.

Goal lut loin halftime hman a ni dawna a lan laiin Inter left back Federico Di Marco chuan angle zim tak aṭangin goal a khung a, 1-0 a hmahruai chungin Inter-in chawlhlawk an hmang.

Second half-ah pawh Inter-in Henrikh Mkhitaryan leh Petar Sucic te hmangin chance nei mah se goal an khung thei lo a, goal 10 khung tawhtu Argentine forward Lisandro Martinez vanneih zan a ni lo bawk.

Si khat faia Inter an chak mai dawna a lan hnuah Marcus Thuram chuan counter attack aṭangin chak nem nghehna goal a khung ve leh a, 2-0 in Inter an chak.

Table-ah Inter hi pakhatna an nih chhunzawm zel a, AC Milan aiin point liin an sang zawk. Nizan inkhela AC Milan result a zirin an inthlauhna hi a la dang thei thung.

Atalanta chuan 2-0 in an mikhualna ramah Bologna an hneh a, Atalanta tan AFCON khelh vangin Ademola Lookman awm lo mah se Nikola Krstovic chuan a hmun ruak a hnawh khat hneh hle.

Montenegrin forward Krstovic hian minute 37-naah leh minute 60-naah goal khungin a team a chakpui.

Juventus pawhin Sassuolo chu an khelmualah luhchhuahin, 3-0 in an sawp. Minute 16-na lekah Sassuolo defender Tarik Muharemovic chuan an lamaha a tilut palh a, Sassuolo an tho chhuak tawh lo.

Turin club tan Minute 62-nahh Fabio Miretti chuan an hmahruaina belhchhah ve lehin, Canadian forward Jonathan David chuan minute khat hnu lawkah an chak nem nghehna goal a khung a, nuamsa takin Juventus an chak.

Napoli erawhin an mikhual Verona laka goal an chhuah hnuah an si phurh sutin an draw thei hram. Diego Armando Maradona Stadium-a inkhelah mikhual team tan Martin Frese chuan minute 16-naah hmahruaina goal a khung a, minute 27-naah Gift Orban chuan khung ve lehin an hmahruaina a belhchhah a, Napoli an hawi hai.

Antonio Conte hoten halftime an hmang ṭha tih a hriat a, minute 54-naah Manchester United midfielder hlui Scott McTominay chuan an si phurh sut ṭhenin, corner aṭanga ball lo kal chu a tauh lut. Man United aṭanga an hawh Rasmus Hojlund chuan goal khung angah inngai mah se a kuta ball a khawih palh avangin pawmsak a ni lo.

Napoli an chak lo mai dawna a lan hnuah Luca Marianucci ball vawrh luh chu Giovanni Di Lorenzo chuan ṭha taka pet goal-in, an si phurh a sut zo. Napoli-in chak tumin nawr viau mah se goal an khung theih loh avangin point khatah an lungawi a ṭul. Table-ah Napoli hi pathumnaah awm chhunzawmin, an hnuaih chiaha awm Juventus aiin point hnihin an sang zawk.