City-in point hloh leh tawh

Premier League champion inumnaah Manchester City-in beisei a pha lo hle. Pep Guardiola hote hi Nilaini zan khan Brighton nen 1-1 in an inhnehtawk a, match hnuhnung pathumah point thum chauh hlawh chhuakin, point ruk an hloh.

City hian match 21 aṭangin point 43 an hlawh chhuak a, Arsenal aia match khat an khel tam chungin point ngain an pha lo. Nizan khan Gunners leh Liverpool an inhmachhawn a, result kan hre hman lo.

Hliam vanga buai

Pep Guardiola-a'n hliam vangin tlarhnungah duh thlan tur a nei lo. Brighton an hmachhawn ṭum hian John Stones, Josko Gvardiol leh Ruben Dias te hliam vangin a chhawr thei lo a, AFCON vangin Rayan Ait Nouri a awm lo bawk.

Man City tlarhnungah kum 21 mi Abdukodir Khusanov leh kum 20 mi Max Alleyne te an inkawp a, mual sirah Nathan Ake leh Matheus Nunes te an awm.

English defender Alleyne hi England tan kum bithliah inelna hrang hrangah a khel tawh a, Championship club Watford-ah loan hmanga khel ni mah se mamawhna avangin an ko let. Brighton nena an inkhel hi City tana a vawi khat inlanna a ni.

Tlarhnung pawp

Man City tlarhnung an talbuai nghal a, Gianluigi Donnarumma hmuh tur a tam nghal. Minute khatna lekah Pascal Gross-a ball tauh ṭha zet chu Italian keeper hian a dang ṭha hle.

Mikhual team-in chance ṭha an nei hmasa zawk a, Georginio Rutter-a'n City offside trap bum mah se a hun ṭha neih chu goal-ah a chantir thei lo. City an vannei a, Jeremy Doku-a'n penalty hlawh chhuakin, Erling Haaland-a'n minute 41-naah hmahruaina goal a khung.

Second half-ah Brighton tlarhnung tihsual zarah City-in chance ṭha bik an nei a, Bernardo Silva-a'n goal-ah a chantir thei lo. Haaland pawhin goal khung theihna remchangah a khung bik lo.

Minute 60-naah Kaoru Mitoma a rawn inlar a, Japanese midfielder hian box pawnah City player-te bumin goal mawi zet a khung. Mikhual team hian chak tumin Etihad Stadium-ah an la nawr ngam a, goal dang hmuh tur erawh a awm lo thung.

Pep-a thukhawchang

Man City manager Pep Guardiola chuan, "Kan khelh danah ka lawm a, goal chance pawh kan insiam a, goal erawh kan khung thei lo. Goal khung tumin theihtawp kan chhuah zel ang," tiin goal an khung loh vanga point thum hmu lo a nih thu a sawi.

Spanish manager chuan sawi chhunzawmin, "Match thumah chak kan nei lo a, champion a harsa dawn. Mahse, theihtawp kan chhuah zel ang," tiin a sawi a, tlarhnung pawp vang ni loin goal an khung loh vanga chak ta lo an nih thu a sawi nawn bawk.

Man City hian tlarhma tichak turin Antoine Semenyo an la lut dawn a, Pep hian player thar chungchang engmah a hriat loh thu a sawi thung. Pep-a hote hian January 10, Inrinni zan hian FA Cup third round-ah Exeter City an hmachhawn ang a, insiamremna hun an nei dawn.

January 17, Inrinniah Old Trafford an tlawh dawn a, Manchester Derby khelh hmain Newcastle United nen January 13, Thawhlehni zanah League Cup semifinal first leg an khelh a ngai dawn. Manchester United aiin inpuahchahna hun an nei tlem zawk ang.