West Ham an talbuai chhunzawm

Thawhlehni zan Premier League inkhelah West Ham United chuan hma an hruai hnuah an mikhual Nottingham Forest chu an inlehthaltir a, 2-1 in an chak lo. Hammers hian match 21-ah point 14 chauh hmuin 18-naah an awm a, tla thei dinhmunah an ding mek.

London Stadium-a inkhelah team pahnihte inkarah chungnung zawk awm loin an intum tawk hle. Mualneitu West Ham-in goal khung hmasa zawkin, minute 13-na lekah Dutch winger Crysencio Summervile corner aṭanga ball lo kal chu Nottingham defender Murillo chuan lo tauh pialin an lamah a tauh goal palh a, West Ham-in hma an hruai.

Goal an khung hnu lawkah Summerville chuan an goal hnihna a khung mah se, goal an khungna kawngah Lazio aṭanga an lak thar Taty Castellanos a offside avangin West Ham goal hnihna sut leh a ni.

Hammers phur hman viau mah se chance hlauhawm an insiam chhunzawm theih loh avangin goal dang lut loin chawlhlawk hman a ni.

Nottingham-in halftime chawlh an hmang ṭha a, ball an chang tam zawk. Minute 55-naah Elliot Anderson-a corner aṭanga ball lo kal chu Nicolas Dominguez chuan West Ham keeper leh defender te dan phak loh chiah chiaha tauh lutin an si phurh a sut.

Team pahnihten point an insem mai dawna a lan hnuah West Ham keeper Alphonse Areola chesualin ball a ben chhuahna lamah penalty a chawi palh. Morgan Gibbs-White chuan an chakna goal ni turin penalty a pet goal a, 2-1 in West Ham an lehthal.

Nikum September-a Graham Potter thlaktu Nuno Espirito Santo hian West Ham a zawm hnuah match 16 aṭangin point 11 chiah a la hmuhpui a, West Ham coach lo ni tawh zingah ani aia record nei chhia an la awm lo. Nuno hi a tirah club hotuten chhan viau mah se result a neih ṭhat loh avangin a chungthu an ngaihtuah mek niin chanchinbu ṭhenkhat chuan an sawi.

West Ham hi tun season-ah an che chhe hle a, match 21 khelh tawhah vawi thum chiah la chakin vawi 12 an tlawm tawh a, vawi nga an khingpuite nen an inhnehtawk tawh bawk. Hammers hi relegation zone-ah awm chhunzawm zelin an hneh loh tak Nottingham chu point liin an pha lo mek a, an hnuaiah Burnley leh Wolves te chauh an awm a ni.