Super Cup-ah Real Madrid inlan zan

Zanin dar 12:30 hian King Abdullah Sports City, Jeddah-ah Real Madrid leh Atletico Madrid te an inhmachhawn dawn a, Super Cup semifinal a nih bakah Madrid derby a nih bawk avangin inkhel hmuhnawm a beisei ngam ang.

Real Madrid hian kum bul ṭha taka ṭanin Real Betis chu 5-1 in an hneh. Xabi Alonso hote hian an ṭhenawm club hi La Liga-ah 5-2 a an hneh loh hnuah an intawn lehna hmasa ber a ni dawn a, hneh ngei an duh dawn.

Real tan French forward Kylian Mbappe chu hliam vangin a inlan dawn lo tih a chiang tawh a, Super Cup khelhna hmun Saudi Arabia-ah pawh a zin ve lo. Mbappe hian Instagram kaltlangin a ṭhiante duhsakna a hlan a, anmahniah rinna a nghah thu a sawi bawk. Mbappe bakah hian Dean Huijsen, Trent Alexander Arnold leh Eder Militao te chu inhliam vanga inlan thei dawn lo a, Brahim Diaz pawh AFCON a khelh avangin a inlan dawn lo bawk.

Amaherawhchu, Real hi mangang tur erawh an ni lo - Real Betis an hneh ṭumin Gonzalo Garcia chuan hattrick a siam a, Mbappe hmun ruak hnawh khah zel a duh dawn. Hei bakah hian captain Dani Carvajal lo kir tura beisei a ni a, a hmun ruak lo hnawhtu Fede Valverde bakah Vinicius Junior leh Jude Bellingham te an awm dawn bakah inkhel turin Rodrygo a inpeih bawk. Brazilian winger Rodrygo hi season tir lamah khel tam lo mah se tun hnaiah a che ṭha a, match hnuhnung pangaah goal hnih leh assist vawi thum a nei a ni.

Atletico Madrid erawh Real aiin inhliam an nei tlem zawk a, Clement Lenglet, Nicolas Gonzalez te an inlan thei dawn lo a, midfielder Pablo Barrios a dinhmun a chiang lo bawk. Amaherawhchu, player inhliam ho hi an position ṭheuhah anmahni thlaktu tur an awm vek bakah Argentine striker Julian Alvarez leh Norweigian striker Alexander Sorloth te tlarhmaah an inkawp theih dawn avangin an hmelma Real Madrid hneh thei turin an ṭha tawk.