World Cup khelh beiseiin Neymar-a’n contract a pawtsei

Brazil forward Neymar chuan kumin World Cup-a tel ngei a duh avangin Santos-ah kum 2026 tawp thleng atan contract a pawtsei. Kum 33 mi Neymar hi nikum January khan Al Hilal aṭangin football-a bul a ṭanna club-ah a kir a, Brazilian forward hi hliamin a tlakbuak nasat avangin kum 2023 hnuah ram tan a la khel leh miah lo.

Barcelona leh Paris St-Germain star hlui hian season liam ta khan hliam nei chungin Santos tan a inlan fo a, Brazil league sang ber aṭanga an tlak loh nan game hnuhnung pangaah goal nga a khung a ni. Hemi hnu hian a khup veilam (meniscus) a zai tir a, hei hi kumin nipuia khelh tur World Cup-a Brazil squad a tel a inbeisei vang a ni.

Neymar chuan, "Santos hi ka chenna a ni a, ka in a ni. Helai hmun aṭang hian ka beiseina, ka la tihhlawhtlin hmabakte tihhlawhtlin ka duh," tiin a sawi. Brazil coach Ancelotti chuan October thla khan Neymar hi ram tana khelh tura koh leh hmain a dam ṭhat a pawimawh thu a sawi. Brazilian forward hian ram tan goal 79 khung tawhin Brazil tana goal khung tam ber a ni mek.

Barcelona star hlui Neymar hi October 2023 khan a khup hliam (ACL) zai avangin thla 12 chhung a chawl tawh a, nikum khan ram tana khel tura koh leh tum ni mah se a tihrawlah hliam a neih avangin koh theih a ni ta lo.

Brazil hi group C-ah Scotland, Morocco leh Haiti-te nen an awm ho a, inelna hi June 11 aṭanga khelh ṭan tur niin, Canada, Mexico leh United States ten an thleng ang.