Bayern-in Karl chelh an tum

Bayern Munich chuan rawlthar duhawm Lennart Karl chu contract ṭha zawk zawrha Allianz Arena-a thlun ngheh an tum. Kum 17 mi Karl hian February 22 hian kum 18 a tling dawn a, tun hnaia Real Madrid tana khelh a châk thu a sawi avangin club ṭantute lamin chhuah chhal nasa mah se a hlawh erawh a pung tho dawn.

Karl hi a contract neih laiah hian kum 18 a tlin veleh a contract neih lai chu kum 2029 thlenga pawhsei a nih theih dan a awm a, khelmual lama a chet ṭhat avangin kum 2031 thleng daih contract ziahpui an tum. Kum khatah Karl hian €1-2mtd a hlawh a, contract tharah chuan kum khatah €5-7mtd a hlawh ang.

A thusawi avanga a inchhir thu Karl hian a sawi tawh a, chutihrualin German legend Lothar Matthaus erawh demna a nei lo. Matthaus chuan, "Lennart Karl kha a dik lohna ka hre lo. Tum lian tak a nei a, amah a inringtawk tih a lang bawk. Keipawh Real Madrid tana khelh chu ka duh alawm. Mahse, Inter Milan-in ka chhuah min phalsak lo," tiin a sawi.

Bundesliga-ah thlasik chawlh an neih avangin January 11, Pathianniah inelna hi ṭan a ni leh dawn chauh a, kum thar atana inpuahchah nan Bavarians hian Thawhlehni zan khan RB Salzburg nen friendly match an khel a, 5-0 in an chak. Rawlthar duhawm Karl hian goal hnih a khung.