Kumin Valentine's Day-ah AIHM 2026; Half Marathon 2026 atan ni 37 a la awm

Aizawl International Half Marathon (AIHM) 2026 chu kumin Valentine's Day-ah (February 14) neih a ni leh dawn a, inelna ṭan nan ni 37 chauh a awm tawh avangin tel tur tan inpuahchahna ṭan a hun ta hle. AIHM 2026 buatsaihtute pawhin nikum November 1, Inrinni aṭang khan registration an hawng tawh a ni.

Bul ṭanna a ṭha

Mizoram sorkar, Innovation India leh Athletic Federation of India ṭangkawpin nikum April 26, Inrinni khan a vawi khatna atan Mizoramah international half marathon an buatsaih a, mipuiin an hlut hle.

RG Stadium, Mualpui aṭangin half marathon hi tlan ṭan a ni a, world bank road zawhin Silai Mual lam panin an tlan a, tlanna ngaiah let lehin RG Stadium-ah bawk an tawp. Inelna hmasa berah hian mi 1500 chuang an tel a, sports minister Lalnghinglova Hmar chuan kumin Valentine's Day-a (February 14) inelna neih hunah mi ṭhahnem zawk an tel ngei a rin thu a sawi.

AIHM 2026 bul ṭanna a ṭha a, chief patron Mizoram larsap Gen. Vijay Kumar Singh pawhin, "Hetiang event Mizoramin a buatsaih thei hi ka lawm takzet a, nakkumah a lian zawka buatsaihna tura ka tih ve theih apiangah ka tel zel ang. Sports Minister leh a team chungah ka lawm takzet a, organisation a ṭhain a felfai a, India ram pumah Mizoram a ṭha zawngin he half marathon hmang hian kan phochhuak ang," tiin a fak a, chet chhuah a inhuam thu a sawi tel bawk. Mizoram larsap thusawi hian AIHM bul ṭanna a ṭha tih a nemnghet.

Hriselna leh fitness

Mizo mipuiin hriselna an ngai hlu chho a, damloa inenkawl man san zia an hriat bakah hrisel nawmzia an hriat avangin infiammi ni kher lo pawh taksa insawizawi ṭhin pawh an ṭhahnem ta hle.

Mizoram sports minister Lalnghinglova Hmar chuan, "Lawmman lam ngaihtuah lem lo, hriselna leh fitness atana tlan tur hlei hlei kan 'welcome' a, mipui ṭhahnem tak an tlan theihna turin km 10 leh km 5 tlan buatsaih tel a ni. Naupang pual inelna siam a nih bakah kum upa senior citizen tan buatsaih a ni bawk ang," tiin half marathon-ah lawmman lak tum loa hriselna atana tlan turte an ngaih pawimawh thu a sawi.

AIHM hmasa berah Electric Veng pa kum 90 mi VL Bela a tel a, 5km a tlan thleng ṭhak. Kulikawn pa Lalramthanga (kum 84) mi pawhin 5km a tlan thleng bawk. AIHM 2026-ah chuan veteran category siam a ni tawh dawn a, naupang lam category pawh a la awm zel dawn tih hriat a ṭha bawk.

Inbuatsaih a hun

Mizoram tan khawvel pum huap inelna buatsaih hi thil hautak a ni a, AIHM hi international level tih a hriat a ṭha. Inelna vawi hnihnaah chuan state pawn bakah ram pawn aṭanga rawn tel an ṭhahnem lehzual dawn a, hetiang karah hian tualchhung miin hlawhtlinna chang se a duhawm hle.

Tetea Hmar chuan, "Tualchhung mi a tam thei ang tlan turin ka sawm, tun aṭangin inbuatsaih ila, kan lawmman ṭha tak tak siamte hi tualchhung mite ngeiin dawng thei ila duhthusam a ni. State pawn leh ram pawn atanga tlan turte el phak turin tunah i inbuatsaih ang u khai," tiin Mizo mipui a chah a, marathon tlan ṭhinte tan inbuatsaih ṭan a hun.

Registration chu

Aizawl International Half Marathon (AIHM) 2026 pual hian website a awm a, aihm2026.com-ah hriat tur pawimawh ang chu a awm vek. Registration tihna thlengin a awm.

Registration hi India khua leh tui tan Rs 799 a ni a, international event lian leh mahni infiahna tur a nih avangin hetiang zat sen hi a na lo. Foreigner tan erawh registration tih man hi $30 a ni a, India pawisa chuan Rs 2600 vel a ni.