AFCON : Amad-a'n Ivory Coast quarterfinal a thlenpui

Africa khawmualpuite inelna African Cup of Nations (AFCON) round of 16 chu khelh zawh ni ta a, Thawhlehni zan inkhelah Algeria leh Ivory Coast ten an khingpui DR Congo leh Burkina Faso te hnehin quarterfinal an lut. A thiam pariat zingah Algeria leh Ivory Coast bakah Mali, Senegal, Cameroon, Morocco, Nigeria leh Egypt te an tel a ni.

Algeria leh Congo te inkhelah hun pangngaiah goal a lut lo a, Riyad Mahrez telna Algeria tan extra time-ah Adil Boulbina-a'n goal awmchhun a khung a, 1-0 in an chak. Ivory Coast chuan an ṭhenawm ram Burkina Faso chu 3-0-in an sawp a, Amad Diallo-a'n goal hmahruai khungin Yan Diomande leh Bazoumana Toure ten goal khat ve ve an khung bawk.

Algeria an vannei

Stade Prince Moulay El Hassan, Rabat-a inkhelah a tir aṭangin Algeria a chungnung zawkah an ṭang a, chance hlauhawm erawh an insiam tam lo. Congo erawh a bet zawkah an ṭang tluan thung.

A bet zawkah ṭang mah se Congo hmatawng ten Algeria keeper Luca Zidane chu an rum ṭhaih ve deuh reng. France legend Zinedine Zidane-a fapa Luca hian Algeria tan khelh a thlang a, tun inelnaah clean sheet vawi li nei tawhin a che ṭha hle.

Team pahnihten goal an khung theih loh avangin extra time khelh a ni. Extra time-ah Algeria bawkin inkhel an thunun a, chance hlauhawm pawh an nei nual. Mahse Congo keeper Lionel Mpasi chet ṭhat zan a nih avangin goal erawh an khung thei lawk lo.

Algeria an vanduai reng lo - penalty shootout hmangin chak zawk an zawng tawh mai dawna a lan hnuah goal an khung hlauh. Minute 119-naah Algeria midfielder Ramiz Zerrouki ball pek ṭha tak chu winger Adil Boulbina chuan um lutin, West Ham defender Aaron Wan-Bissaka a bum hnuah goal kilah mawi takin a khung a, Congo keeper Mpasi tan dan ngaihna a awm lo.

Congo tan an si phurh sut nan hun a awm tawh loh avangin Algeria 1-0 in an chak a, quarterfinal an lut.

Ivory Coast an ṭha

Inkhel dangah champion lai Ivory Coast chuan Burkina Faso hneh turin harsatna an tawk lo, goal thum khungin 3-0-in an ṭhenawm ram Burkina Faso an hneh.

Stade de Marrakech-a inkhelah hian ṭan aṭangin Ivory Coast an hlauhawm nghal a, Amad Diallo, Franck Kessie leh yan Diomande ten chance nghal mah se an hlah vek thung. Minute 20-naah Amad Diallo kan hmu nawn leh a, Amad hian buai nuai nuai karah cool takin Burkina Faso keeper Herve Koffi chip in Ivory Coast hma a hruaipui.

Minute 32-naah Amad bawk kan hmu leh - ding lam sir aṭanga ball khalh lutin Yan Diomande tan a pe a, Diomande chuan ṭha taka lo pet goal-in an hmahruaina a belhchhah. Manchester United winger Amad Diallo a nung ṭha hle. Goal dang a luh belh tawh loh avangin 2-0-in chawlhlawk hun hman a ni.

Second half-ah pawh Ivory Coast bawk a chungnung zawkah an ṭang a, champion lai an nih chhan pholangin game an thunun hneh hle. Burkina Faso erawh bet tluanin chance hlauhawm an insiam thei meuh lo.

Goal a luh loh vang vang hnuah solo goal ropui kan hmu. Minute 87-naah Ivory Coast left back Bazoumana Touré chuan anmahni penalty box aṭanga ball khalh ṭanin chak takin a tlanpui a, Burkina Faso goal bul thleng a khalh phei hnuah tawih takin an goal thumna a khung. Tun inelnaa goal ropui zinga chhiar tlak a ni. Goal dang lut zui tawh loin hun a tawp a, 3-0-in Ivory Coast an chak.

Quarterfinal chu

Thawhlehni zan inkhel a zawh hian quarterfinal lut an hriat kim chiah a; January 9, Zirtawpni zan aṭangin semifinal khel tur zawnna hi neih ṭan a ni dawn. Senegal leh Mali ten quarterfinal match hmasa ber an khel ang a, zan dar 12:30-ah inelna thlengtu Morocco leh Cameroon te an inkhel zui ang.

Algeria chuan January 10, Inrinni zanah 4-0 a Mozambique hnehtu Nigeria an hmachhawn dawn a, Ivory Coast hian Inrinni zanah vek hian vawi sarih champion tawh, Mohamed Salah telna Egypt nen semifinal luh an inchuh ve thung ang.