Liverpool tan khua a var thei lo

Cody Gakpo-a'n kawr phelh meuhin Fulham laka a goal khung a lawm a, Liverpool a chakpui emaw a inti hman tawh - a beisei ang erawhin thil a kal lo chiang hle.

Fulham lamin goal an khung ve leh a, 2-2 in inkhel a tawp daih! Pathianni zan khan Liverpool-in khualmualah Fulham an lenchilh a, point khatah lungawi an zir.

Mualneitu lam hian Harry Wilson hmangin hma takah goal hmahruai an khung a, rei tak chu 1-0 a ni reng. Wilson-a goal khung hi a tirah pawm ni lo mah se, VAR a inrawlh hnuah Virgil van Dijk vangin a offside lo tih hmuh a ni a, goal-ah pawm zui a ni.

Chawlhlawk hman hnuah Liverpool an insiamṭha a, an khel a nung sawt. Tun hnaia Liverpool tana a hlutna pholangtu Florian Wirtz-a'n minute 57-naah si phurh a sut a, German midfielder hi Premier League khawvelah a tlangnel tawlh tawlh.

Fulham tan goal hmahruai khungtu Wilson-a'n khung belhna remchang a nei a, mahse, uiawm takin bar a tihper - Liverpool academy chhuakin a club hlui manganna a belhchhah teuh hle.

Hun pek belh minute lina a ni a, Liverpool vanneihna a her chhuak - hliam vanga Hugo Ekitike tel loa inkhel Reds tan Gakpo-a'n goal a khung a, 2-1 a ni.

Thil thlen dan thlirin Reds hi an chak ngei dawn niin a lang tawh a, mahse, beisei ang erawhin thil a kal lo. Hun pek belh minute sarihnaah Harrison Reed chuan goal mawi bik a khung a, si phurh a sut zo!

Chak tura inngai tawh Liverpool an chak zo leh ta lo a, Reed-a'n duh tawka ball petna tur hmun awl a nei thei chu Reds player-ten an thiam loh a ni tih an hmu thiam ang.

Liverpool-in top four-a an dinhmun sawhngheh lehzualna remchang an neih an chhawr lo a, top four chinah la awm mah se, pangana Chelsea leh parukna Manchester Unite aia an sanna hi point thum chauh a ni a, vawi khat chetsualin thawnthu a la her danglam thei.

Reds head coach Arne Slot chuan, "Khualmualah goal hnih kan khung a, mahse, kan chakpui zo si lo. Tun season-ah chak mai tura inngaih tawh hnua point hloh hi kan nei leh ṭhin a, tun hi a vawi khatna a ni lo.

"2-1 a nih hnuah Joe Gomez kan luhtir a, mahse, awmzia a neih hmain goal an rawn khung ta mai si. Result ṭha tak hlawh tur kan ni asin mawle," a ti.

Liverpool hi league match riat chhung a zawnin an tlawm ta lo a, mahse, heng zinga match liah hian an khingpui an inhnehtawkpui thung - Fulham hma chiaha an match-ah hian Leeds United an draw a, January 8 zanah Arsenal an lenchilh zui ang.