City-in Arsenal tan kawng an hawng zau
Arsenal-in Premier League-ah hma an hruai sang fal zel - anmahni umtu ber Manchester City an tawlhthlu leh tawh a, coach pangngai nei loa khel Chelsea nen 1-1 in an inhnehtawk!
Chelsea-in coach Enzo Maresca an ban avangin, Under-21 coach Calum McFarlane kaihhruaina hnuaiah Etihad Stadium an leng a, City tan tun tluka Chelsea hmachhawnna hun ṭha a awm chuang lo.
Mahse, Pep Guardiola nauten an hun ṭha neih an chhawr thei lo a, minute 42-naa Tijjani Reijnders hmanga an goal khung chu chakpui mai turah inngai hman mah se, hun pek belh minute linaah Enzo Fernandez chuan si phurh a sut a, 1-1 in an ṭin.
City-in point 42 an hmu a, pakhatna Arsenal chu point rukin an phak lo tawh a, an hnuai chiaha awm Aston Villa chuan an point hmuh ang zat an hmu ve bawk. Gunners-in champion rim an nam ṭan e!
Chelsea an fimkhur
McFarlane-a'n Chelsea coach lailawk a nih chhungin mualpho a duh lo a, âtthlak taka City nawr ai chuan tlarhnung ven a ngai pawimawh zawk - hei hian mualneitu City a talbuai tir a, goal an khung lawk thei lo.
City hian minute 37-naah shot hmasa ber an nei ve chauh a, mahse, Erling Haaland-a chance neih chu goalkeeper Filip Jorgensen-a'n a dansak - Blues an vannei.
Hetah hian a la tawp mai lo. Haaland bawk kan hmuh chhunzawm a, mahse, Chelsea hmachhawn hmaa league match hnih a zawna goal khung tawh lo Haaland-a vanneih zan a ni lo.
Norwegian striker hian a chance neih chu post tihper nan a hmang! Mahse, a nawrtu zawk an ni miau a, City-in goal an khung ta nge nge - minute 42-naah Reijnders chuan Etihad Stadium thawm reh tak chu a au tir a, goal hmahruai a khung.
Mahse maw...
First half-a bet zawk Chelsea-in sermon ṭhami an ngaithla a ni mai thei - chawlhlawk hman hnuah an phur sawt a, goal khung theihna remchang pawh an nei vat.
Mahse, Pedro Neto chuan hnai tak aṭangin a chance neih ṭhat a hlah a, bench aṭanga luhtir Liam Delap-a'n Gianluigi Donnarumma a paltlang thei lo bawk.
Minute 90 a ni tawh a, 1-0 a la ni. City an chak mai dawn niin a lang tawh. Mahse, Manchester khaw club beisei angin thil a kal lo - hun pek belh minute linaah Enzo Fernandez chuan si phurh a sut!
Etihad Stadium-a Chelsea fans tam lo tak chu an sapatal a, City erawh Pep hoin an ngui - match hnih chu a zawnin an khingpui an inhnehtawkpui ta a, an thiampuipa Haaland-a'n match thum chhung a zawnin goal a khung ta lo bawk.
Team inlungrual
Kum thar niah tak Chelsea fan-ten chanchin lawmawm lo an hria a, an coach Maresca nen an inṭhen - chumi hnua an match hmasa berah City an hmachhawn zui!
Hei chauh a ni lo - senior team la kaihruai ngai miah lo McFarlane-a enkawlna hnuaiah an khelh a ngai a, khawvela coach ṭha ber ang hiala mi tam takin an chhal Pep Guardiola an la hmachhawn zui bawk.
Damlohna avangin defender Wesley Fofana a inlan thei lo a, first choice keeper Robert Sanchez leh fullback Marc Cucurella te hliam vangin an chawl a, hrem vangin Moises Caicedo a inlan thei lo.
City tan duhthusamin engkim a kal emaw tih mai tur a ni a, mahse, Chelsea-in team inlungrualna lantirin, Etihad Stadium-ah point an hlawh chhuak - table-ah pangana an ni a, point thum chauhin pathumna Liverpool an phak lo mek.