Chelsea leh Maresca an inṭhen

Chelsea chu an head coach Enzo Maresca nen thla 18 an inhrawn hnuah Ningani khan an inṭhen a, Maresca hian Blues a chhuahsan chhan hi chiang taka puanzar ni lo mah se club medical team nen an thu a inhmuh loh vang niin khawthlang media te chuan an sawi. 

Maresca hian nikum November-a Manager of the Month lawmman a dawn hnu khan a team a chet ṭhatpui hleithei lo a, an match hnuhnung pasarihah vawi khat chiah chakpuiin, hmahruaitu Arsenal an phak lohna chu point 15 lai a ni. Maresca hian December thlaa Everton an hmachhawn hma khan "darkar 48 hrehawm ber," tiin a lo sawi tawh bawk. Hemi hnu hian Manchester City boss Pep Guardiola thlaktu tur angin thuthang a awm chhunzawm, Maresca hian a Chelsea-ah a hlim thu sawi ve bawk mah se a dinhmun a nghet lo zui, kum a lo thar meuh chuan nikum nipui laia Club World Cup a chawipui London club hi a chhuahsan ta a ni.

Chelsea chuan thuchhuah siamin "Enzo hi club-ah a cham chhunga hlawhtlinna min chanpui avang te khan kan lawm a, a kal zelna turah duhsakna duhsakna kan hlan a ni," tiin an thlah.

Maresca a chhuah rualin a thlaktu tur chu an inrinsiak nghal a, thu leng vak tam tak karah Strasbourg coach Liam Rosenior hming chu a ri ring hle. Hull City pawh lo enkawl tawh tu Rosenior hian Strasbourg hi Ligue 1-ah pasarihna a nihpui mek. Kum 41 mi Rosenior hian coaching lamah tawnhriat la nei tlem viau mah se club vantlang Strasbourg chu a chet ṭhatpui avang leh player naupang a enkawl thiam avangin Chelsea hian an coach thar atan an duh niin chanchinbu tam tak chuan an sawi. 

Chelsea hian Pathianni zan dar 11:00 -ah Manchester City an tlawh dawn a, City hi an mikhualna rama in draw hlim an nih avang leh hmahruaitu Arsenal thlah fal an duh dawn loh avangin chak ngei an tum dawn a, inkhel hmuhnawm tak a beisei ngam. Blues hi under-21 coach Calum McFarlane chuan City an tum hunah hian a lo enkawl lailawk dawn a ni.