Premier League champion tum inum a nung

Premier League ṭantirh lamah Arsenal-in kal fal mah se kum 2025 a zawh dawn meuh chuan Gunners hi Manchester City leh Aston Villa ten an hlat lo. Champion lai Liverpool an insiamṭha ṭan a, Chelsea leh Manchester United pawh a sang paruk zingah an awm.

Kum tawp boruakah Arsenal han talbuai deuh mah se lei rem an rap leh taw a, December thla tira Aston Villa an hneh loh hnuah Champions League leh League Cup chhiar telin match nga a zawnin an chak leh tawh. Gunners hian an match hnuhnung berah Brighton 2-1 in an hneh a, fiahna tak tak erawh Aston Villa lakah an hmachhawn ang.

December 30, Thawhlehni zan dar 1:45 hian Gunners-in a sang pathum zinga tel pha Aston Villa an mikhual dawn. Mikel Arteta hote hian Unai Emery hote hi an hneh thei a nih chuan pakhatna nichungin kum 2025 an khar ang.

Manchester City-in harhtharna an chang a, match riat chhung a zawnin an chak leh tawh. Pep Guardiola enkawl an nih avangin pahnihnaah awm mah se Arsenal nen an inkar hi point hnih lek a nih avangin Gunners ṭantute awm an ti nuam lo hle.

Pep-a hote hian kartawp khan Nottingham Forest 2-1 in an hneh hram a, point thum hlu tak hlawh chhuak turin Erling Haaland khel ṭha lo mah se player thar Rayan Cherki leh Tijjani Reijnders te an vul. City hian January 1, zan dar 1:30-ah Sunderland an hmachhawn dawn a, an inkhelhna tur hi Stadium of Light a nih avangin fimkhur a ṭul dawn.

Liverpool a zawnin match li an chak leh tawh a, an player thar Florian Wirtz-a'n Wolves an hneh ṭuma goal a khung avangin inrintawkna an ngah sawt ang. Mohamed Salah-a'n AFCON an khelh avangin khelmual pawn lamah boruak ṭha lo hriat tur a tlem a, Arne Slot-a hote khelmual chhungah an insawrbing thei ang. Reds hian kuminah inkhel an nei tawh lo a, January 1, Ningani zan dar 11:00-ah Leeds United an mikhual ang.

Chelsea leh Manchester United ten chet ṭhat lai nei ve bawk mah se nomawi an chuh phah lo. Blues-in an match hnuhnung berah Villa an hneh lo a, December thlaah ringawt pawh point 10 an hloh tawh. Man United erawhin Bruno Fernandes leh Bryan Mbeumo tel loin Newcastle United an hneh thei a, season thara Champions League khelh tumin ṭan an la ang.