Vawiinah Mizoram vs Nagaland

Vijay Hazare Trophy-ah Mizoram chuan vawiin zing dar 8:45 hian Nagaland an hmachhawn dawn. Inelna hi Ranchi-ah khelh tur a ni a, Mizoram hi Syed Mustaq Ali Trophy (plate group)-a champion zo hlim an ni.

Mizoram hian inelnaah hian bul an ṭan ṭha lo a, match hmasa pahnihah Meghalaya leh Arunachal Pradesh te an hneh loh avangin final luh a harsa tawh dawn. Plate group-ah hian Meghalaya, Arunachal Pradesh leh Nagaland bakah Manipur leh Bihar te an awm.

India ramah hian BCCI-in state inelna lian pathum a buatsaih ṭhin a, Vijay Hazare Trophy bakah Ranji Trophy leh Syed Mushtaq Ali Trophy te a buatsaih. Ranji Trophy hi ngaihhlut ber niin ni li chhung (multi day) hmanga inelna a ni a, Vijay Hazare Trophy hi over 50 hmanga inelna niin Syed Mushtaq Ali Trophy hi over 20 hmanga inelna a ni thung.