Havertz a lo kir hnai

Arsenal manager Mikel Arteta chuan a player pawimawh, hliam vanga chawl reng Kai Havertz chu club tan a inlan theih leh ṭep tawh thu a sawi a, zanin ar 8:30-a Brighton & Hove Albion an mikhual huna a inlan dawn leh dawn loh erawh a sawi lawk lo.

Havertz hi tun season-a an match hmasa berah khup hliam avangin lakchhuah a ngai a, khami hnuah khan Gunners tan a inlan leh tawh lo. Mahse, tun hnaiah training a zawm leh tawh a, ngai a awh leh ṭep tawh.

Arteta chuan, "Ni rei loteah Gunners tan a inlan thei leh tawh dawn a, kar chuang chuang chu kan nghah a ṭul tawh kher lo ang - kan hre zel ang chu.

"Player pawimawh tak a ni a, a tel loh lain kan mamawhzia a lang ṭhin. Team tana danglamna thlen ṭhin a ni a, a lo kir hnai tih hriat hian min tithlamuang hle," a ti.

Havertz hian season hmasa khan Gunners tan inelna hrang hrangah match 36 khelin goal 15 a khung a, assist vawi nga a nei thei. A tel loin Arsenal erawh ngaihtuahawm lutuk an ni lo a, Premier League table chung ber an luah mek - an san falna hi point hnih chiah a ni thung.