Manchester United-in Newcastle hneh

Premier League club talbuai Manchester United-in hliam leh international duty vangin, senior player pasarih ngawt chhawr thei lo mah se, team ṭha Newcastle United lakah 1-0 in an chak a, Premier League table-ah pangana an ni.

Manchester United tan Patrick Dorgu chuan inkhela goal awmchhun a khung a, striker man to Benjamin Sesko erawh a vanneih zan a ni lo - crossbar a pet per a, Magpies tan Lewis Hall pawhin bar a tihper bawk.

Old Trafford-ah Newcastle an vanduai tiin a sawi theih - vawi 16 ngawt shot an neih lain goal an khung thei lo a, United hian vawi kua shot an nei thung! Magpies hian United box chhungah vawi 43 ngawt ball an tawh lain, United erawhin vawi 15 bak an tawk lo!

Manchester United boss Ruben Amorim chuan, "Inkhel dangah, hei aia kan khingpui laka game kan thunun hi a tam mai. Mahse, zaninah erawh goal kan chhuah lo a, chu chuan min tilawm a ni," a ti.

Amorim chuan sawi zawmin, "Tawrh a ṭul hunah chuan kan tuar tlangin kan bei tlang ang. Zanina chak kan duh anga kan khel zel a nih chuan match tam takah kan la chak dawn a ni," a ti a, a naute khelh danah a lawm.

United-in hnehna an chan avangin top four china awm Chelsea point hmuh ang zat an hmu ve ta chiah a, mahse, Blues aiin match khatin an khel tam thung. Chelsea hian zanin dar 11:00-ah team kaltluang tak Aston Villa an mikhual ang.