Arsenal-in League Cup semifinal lut

Premier League hmahruaitu Arsenal chuan League Cup lamah pawh nomawi an hnaih zel a, nizan khan quarterfinal inkhelah Crystal Palace an hneh a, semifinal an lut.

Gunners hian mikhual team lakah beisei ang erawhin goal an khung lo. Minute 80-naah Palace player Maxence Lacroix chuan an lamah a tilut a, hun tawp a hnaih tawh avangin Arsenal an chak mai a rinawm hman.

Mahse, beisei angin thil a kal lo - hun pek belh minute nganaah Marc Guehi chuan si phurh a sut a, 1-1 a ni. Extra time khelh a nih hnuah goal dang a luh loh avangin penalty pet zui a ni a, 8-7 in Arsenal an chak!

French defender Maxence Lacroix tan nizan inkhel hi mangchhia a ni ber. Palace centre back hian an lamah a tilut a ni mai lo a, penalty hmanga chak zawk zawn a nih hnuah pawh goal khung lo awmchhun a ni a, a team a tlawmpui.

Arsenal tana penalty pettu pariatin an chhuih lut vek a, Palace tana a pettu pariatna Lacroix-a pet chu Gunners second choice keeper Kepa Arrizabalaga chuan a dansak a, Palace an tlawm zui. 

League Cup semifinal hi kum thara khelh tawh tur niin, Arsenal hi Chelsea nen an intawng ang a, Manchester City leh Newcastle United ten final luh an inchuh bawk ang.