MFA Elite Football Academy (Red) an champion

Aizawl DFA buatsaih ADFA Junior Boys Football Tournament-ah MFA Elite Football Academy (Red) chuan final-ah penalty shootout hmanga MFA Elite FA (Blue) hnehin an champion. Inelna hi kum 15 hnuai lam tan a ni a, Mizoram Football Association tan an academy team hnih final-a an inhmachhawn hi hlawhtlinna ropui tak a ni.

Chite Playground-a inkhelah MFA Elite FA Red leh Blue te hun pangngaiah 1-1 in an inhnehtawk a, extra time-ah goal khat ve ve khung belh lehin penalty shootout-ah Red an vannei ta zawk. Red champion puitu midfielder H. Lalchhanchhuaha chu best player-a thlan a ni a, Arthur Vanlalpeka'n goal riat khungin top scorer a ni bawk.

Nimin final inkhel hmuhnawm takah hian Blue lamin minute thumna lekah corner kick hmang ṭangkaiin V. Vanlalruatzela hmangin an khung. First half-ah goal a luh belh lo a, minute 52-naah F Vanlalhriatrenga'n freekick aṭangin a khung.

Minute 90 chhungin 1-1 a ni a, extra time minute 20 khelh leh a ni Red-in final an thlen theihna tura semifinal-a Republic Veng laka goal hnih khungtu Arthur Vanlalpeka'n solo goal a nei a, minute 94-naah Red-in 2-1 in hma an hruai. Second half-ah Malsawmtluanga'n Blue tan siphurh a sut a, minute 110 chhungin chak zawk an awm lo.

Penalty shootout-ah Blue tana J. Lalhluzuala pet chu Red keeper PB Lalawmpuia'n a dansak a, Red lam tana goal pawimawh khungtu Arthur-a'n penalty a khung lo. Sudden death-ah Blue aiawha pettu Lalrinmuana'n a pet out a, Red tan Spencer Hmingthanpuia'n chakna goal a khung.

MFA Elite FA (Red) coach MS Dawngliana (Valpuia) chuan, "Semifinal-ah team ṭha Republic Veng kan hneh a, inkhel hautak a nih avangin final-ah kan naute an chau. Chutihrualin an huaisen zia kan hmu a, tlawm an duh lo. Kan naute thawhrim leh huaisen rah kan seng a ni," tiin Vanglaini a hrilh.

Red team hi Valpuia bakah assistant coach Lalhmangaihsanga Ngente leh physio Ramropuii te an enkawl a, kum lamah Blue aia an naupang zawk chungin nomawi an chawi a, an hlawhtlinna hi a ropui hle.