Zaninah Ter Stegen inlan mai thei

Barcelona keeper Marc-André ter Stegen chu a hnungzang hliam vanga ni 139 zet a chawlh hnuah a lo kir leh tawh a, zanina Copa del Rey match-ah inlan tura beisei a ni.

Spanish champion Barca hi zanin dar 1:30-ah Copa del Rey round of 32 khel turin an inlan dawn a, third division club Guadalajara an mikhual dawn.

Ter Stegen-a hliam dam hnuah Barca hian match hnih khel leh tawh mah se, German keeper hi bench-ah dah ve ve a ni a, coach Hansi Flick chuan nipui transfer-a an lei Joan Garcia chu number 1 a nih thu a sawi chiang tawh.

Flick chuan, "Thil chiang tak chu Joan hi ka number 1 keeper a ni," a ti a, Ter Stegen hi tunah chuan third choice a ni mek - Barca hian Wojciech Szczęsny an nei bawk a, mahse, Juventus keeper hi hliam vangin a chawl mek.

Ter Stegen hi nakkumah World Cup a khel duh a nih chuan chhuak mai tura rawntu a ngah viau a, mahse, amah ber hian kum 2028 thlenga a contract neih chu hman zawh a tum niin an sawi.

Barcelona captain, season ṭantira a captain nihna an hlihsak hnua an pek let leh keeper hi Turkish club ṭhenkhatin an rim mek nia sawi a ni a, mahse, amah ber hi a hmin zan rih lo niin a lang.