Kane awmna Bayern Munich an chelh

Harry Kane-a'n a hna pangngai angin goal khung leh mah se Bayern Munich chak nan a tawk zo lo a, an mikhual Mainz nen 2-2 a inhnehtawkin point khatah an lungawi a ṭul.

Pathianni zan khan Allianz Arena-ah Bavarians hian Mainz an mikhual a, minute 29-naah rawlthar duhawm Lennart Karl chuan hnai tak aṭangin goal hmahruai a khung - mualneitu leh team ṭha zawk hi chak tlang tura rinna a lian.

Mahse, chawlhlawk hma chiahin Kacper Potulski chuan William Boving-a freekick chu tauh lutin si phurh a sut a,second half minute 67-naah Lee Jae-Sung hmangin an goal hnihna an khung let, mikhual lamin 2-1 in hma an hruai let daih.

Hun tawp dawn thlengin Mainz an ṭang khawng tlat a, point thum pawh an hmu teuh hle. Amaherawhchu, hun tawp hma minute thum chauh awm tawhah Potulski chuan Kane ti tluin penalty a chawi a, an beiseina chuai ui bawk.

Penalty pet turin Kane a rawn ding chhuak zui a, England captain hian Bundesliga season kal laia a goal 18-na turin a khung - German football inelna sang berah hian goal 80 a khung tling ta chiah bawk a ni.

Goal dang a lut zui lo a, 2-2 in an inhnehtawk. Bayern Munich coach Vincent Kompany chuan, "Hliam leh harsatna hrang hrang kan tawk a, hun rei tak chhung chu kan ṭhat dan berin kan khel thei lo, tunah chuan kan hun harsa chu kan paltlang ta niah ka ngai.

"Playerh liam ṭhenkhat an rawn dam leh tawh a, tun aṭanga rei loteah chuan kan ṭhat dan takin kan khel chhuak ve leh thei tawh ang. Hun harsa kan paltlang hian min ti lawm," tiin chak zo lo mah se an result-ah a lungawi tih a sawi.

Goal khungtu Kane chuan, "A tirah kha chuan inkhel kan thunun hle a, goal pawh kan khung hmasa zawk. Kan rin loh tak main chawkhlawk hmain an rawn sut a, inkhel kalhmang leh boruak a ti danglam ta dawrh a ni.

"Second half-ah khan khung belh tumin bei nasa viau mah ila goal hmaah kan hriam tawk lo a, a hmawr bawk theih tlat loh chuan duhthusam result neih a harsa," tiin amah ngei pawhin a mawhphurhna goal khung chu a hlen chhuak ṭha tawk lo niah a ngai.

Bayern Munich hian December 21, Pathianni zanah Heidenheim an tlawh dawn a, kumin atana an match hnuhnung ber a ni ang - German ramah chuan krismas vuakvetah thlasik chawlh an hmang dawn a ni.