Serie A hmahruaitu Inter Milan

Italian club lian te Pathianni zan khan an inlan a, kar tawp an hman ṭan laia hmahruaitu AC Milan chu Sassuolo nen 2-2 in an hnehtawk - champion lai Napoli chu Udinese mualah 1-0 in an tlawm bawk.

Kar tawp an hman zawh meuh chuan Serie A table chung berah Inter Milan an awm. Inter Milan hian Genoa chu 2-1 in an hneh a, an elpui ten point an hloh laiin an chak a, a chung ber dinhmun an luah theih phah a ni.

Pathianni zan inkhel dangah Juventus an chak ve bawk. Old Lady hian Juan Cabal-a goal khat hmangin Bologna an hneh a, coach Luciano Spalletti chuan Juve a enkawl china an hnehna chan hoah a pawimawh tih a sawi a, a naute khelh danah a lungawi bawk.

Inter an chak

Luigi Ferraris, Geno-a inkhelah mikhual Inter chu team ṭha zawk an ni a, minute rukna lekah Yann Aurel Bisseck chuan goal kilah a lirin a pet lut a, keeper Nicola Leali-a'n ball kalna zuan fuh viau mah se a dang phak lo a ni.

Inter bawkin an nawr na zui hle, striker ṭha Lautaro Martinez chuan ama palkuak hmangin goal a khung - Argentina international ball lakluh hi lo danper sak mah se, ball per hi laklawh neih miah loin a khung; a hnu lama Vitinha goal khungin awmzia a nei tawh lo.

Inter Milan coach Cristian Chivu chuan, "Khelmual chhunga ka thil hmuh leh hriat kha sawi chhuah a nuam ka ti. Genoa kha team ṭha leh inveng thiam tak mai an ni a, khatiang team laka hnehna chang tura kan beih dan khan min ti lawm hle.

"Player ka thlak kual ṭhin avangin zawhna ka dawng fo, hei chu thil kalphung pangngai a ni. Match khelh tur kan ngah avangin ka tan chuan buaina tur a awm lo, khelmuala lut thei player kan ngah hi a lawmawm," a ti.

Milan leh Napoli

AC Milan tan Davide Bartesaghi a langsra, kum 19 mi defender hian senior team tana a goal hmasa ber leh pahnihna khungin khel ṭha viau mah se a team chak pui nan a tawk lo - Sassuolo lamin Ismael Kone leh Armand Lauriente hmang an khung ve avangin an inhnehtawk.

Milan manager Massimiliano Allegri chuan, "Kan khel chhe lo, goal kan nawr dan leh inven dan kha a dik ṭha hle. Chutihrualin, Sassuolo khan an khel ṭha em em a, a khat tawkin na taka min nawr thut theih avangin a harsa a ni," a ti.

Inkhel dangah Napoli chu Udinese mualah 1-0 in an chak lo; goal awmchhun hi Jurgen Ekkelenkamp-a'n minute 73-naa a khung a ni a, champion lai tan hian awlsam taka nomawi humhim theih a ni dawn lo.

Antonio Conte naute hian Serie A match 15 an khelh aṭangin point 31 an hmu a, hmahruiatu Inter Milan an phak lohna chu point hnih chauh a ni, an inkar zau lo mah se team ṭha dang an awm bawk avangin inelna a hautak chho hle.