Curry ropui mah se Warriors chak lo

Stephen Curry chuan nimin zing khan hriarreng hlawh tawh tur mellung a phun a, kum 30 tlin hnuah match khata point 40 nei tling tam thei ber ni mah se, a team Golden State Warriors erawh an chak lo.

Moda Center, Portland-a inkhelah Golden State Warriors hian Portland Trail Blazers chu 136-131 in an hneh lo, chak turin an dinhmun siamṭha hman viau mah se quarter hnuhnung ber bikah point riat laia an hniam zawkna chu an tuar ta a ni.

Hliam dam hlim Curry hian point 48 ngawt a nei a, kum 30 a tlin hnuah match khata point 40 neih tlin hi ṭum 45 ngawt a nei tawh, hemi huangah hian Michael Jordan-a record hmasa (vawi 44) chu a khum ta chiah.

American star Curry hi hliam dam hlim a ni a, tunah chuan a dam ṭha leh tawh hle; team tan inngahna tlak ni leh tawh mah se thlawptu ṭha a mamawh a, mimala chetṭhat ngawt chu chak nan a tawk zo ta lo a ni.

Portland Trail Blazers tan Jerami Grant leh Shaedon Sharpe ten point 35 ve ve an nei a, anni pahnih bakah hian point 26 neitu Deni Avdija a langsar bawk; anni pathum chet ṭhatna hi an chak chhan langsar a ni.