Man City tan Haaland leh Foden

Premier League-ah Manchester City-in champion zia an lantir leh ṭan a, Pathianni zan khan Selhurst Park-ah Crystal Palace 3-0 in an hneh. Pep Guardiola hote tan Erling Haaland-a'n goal hnih a khung bakah Phil Foden-a'n goal khat a khung bawk. City hian match 16 aṭangin point 34 an hmu a, hmahruaitu Arsenal point hnih chauhin an pha lo.

Man City-in starting eleven nghet an nei chho a, Sunderland hnehtu aṭangin Pep-a'n player pakhat chauh a thlak. Jeremy Doku a inhliam avangin a aiah Tijjani Reijnders a rawn lut a, player 10 erawh a ngai vek an ni. Erling Haaland tlarhmaah a awm a, a hnungah Foden leh Rayan Cherki te an awm. Bench-ah Omar Marmoush leh Savinho te an awm thei bawk.

Pep-a hote hi 3-0 in chak mah se inkhelah erawh an hneh lo. Ṭan phat aṭangin Palace-in chance an nei mawlh mawlh a, Yeremy Pino phei chuan goalkeeper Gianluigi Donnarumma chauh a hmachhawn chungin crossbar a pet per. Ismaïla Sarr pawhin chance ṭha a hlah.

Darkar chanve hnuah City-in chance an nei ve tho a, Rayan Cherki-a'n freekick aṭanga chance a neih chu goalkeeper Dean Henderson-a'n a dansak. Minute 41-naah dinglam aṭanga Matheus Nunes cross chu Erling Haaland-a'n a tauh lut. City-in goal khung mah se Palace zawkin chance ṭha an ngah a, Jean-Philippe Mateta-a'n ṭum hnih a hlah.

Second half-ah pawh Palace bawkin chance ṭha an ngah. Adam Wharton-a'n box pawn aṭangin goal ban a pet per a, City an buai hle. Eagles-in chance ṭha an hlah laiin City erawh chance an hlah ve lo. Phil Foden-a'n minute 69-naah box pawn aṭangin chance awm mang lo aṭangin a khung a, 2-0 a nih tak avangin City dinhmun a ṭha.

Palace hian goal hnih an chhuah hnuah pawh an nawr chhunzawm zel a, Gianluigi Donnarumma-a'n hna a ngah hle. Eddie Nketiah pawhin chance ṭha a hlah a, City winger Savinho erawhin counter attack aṭangin penalty a hlawh chhuak. Haaland a rawn pen chhuak a, minute 89-naah chak nemnghehna goal a khung.

Inkhelah Palace chungnung mah se City 3-0 in an chak a, Pep Guardiola hoten champion zia an chhuah. Spanish manager Pep chuan, "Foden a khel ṭha lo a, a hmanhmawh mah mah ṭhin. Chutihrualin team tan a ṭangkai thung," tiin a sawi. Foden hian 2023/24 season aṭang khan box pawn aṭangin goal riat a khung a, hemi hun chhung hian Europe league sang pangaah amah aia box pawn aṭanga khung tam chu Kylian Mbappe (14) chauh a awm.