Vannei takin Arsenal an chak

Premier League hmahruaitu Arsenal chuan a mawngphah a awm Wolves hneh turin vanneihna an mamawh - Mikel Arteta leh a naute hian Emirates Stadium-ah an mikhual hi 2-1 in an hneh hram.

Bukayo Saka-a corner pet chu Wolves keeper Sam Johnstone chuan anmahni lamah a tilut palh a, hun tawp dawnah Wolves tan Tolu Arokodare chuan sut mah se, hamrik hnuhnung ber rik hma deuh chiahin Yerson Mosquera chuan anmahni lamah a ti lut palh leh a, mualneitu lamin point thum an hmu.

Wolves lamin tlarhnungah player panga dahin an ṭang rei thei hle a, minute 70 thleng chu Arsenal an dangchat thei. Mahse, Saka-a corner pet chu Johnstone-a'n lo net mah se goal ban a per a, ball per let hi Johnstone chuan anmahni lamah a dang lut.

Gunners chak tura an dinhmun a ṭhat laiin tihsual an nei. William Saliba dinpui Piero Hincapie-a'n Arokodare a hnaihchilh tawk lo a, minute 90-naah David Raya dan hman lohin a tauhlut, point hnih hloh thei dinhmunah Arteta naute an ding.

Mahse, North London club hian na takin an nawrlet nghal; Saka-a cross hlauhawm tak chu Gabriel Jesus tana tauh nuam tawk tur chiah a nih laiin Mosquera luah zawk a fuh a, keeper Johnstone tan dan hman a ni tawh lo.

Arsenal manager Arteta chuan, "Tlarhnung phui lo vangin minute hnih bawr kha chu rilru a hah hman hle. Goal khung tuma kan beih dan te, goal kan chhuah hnua kan beih ket dan te kha a lawmawm, goal kan chhuah dan erawh ngaihtuah tawk loh vang a ni," a ti.

Gabriel leh Saliba te inhliam chungin Arsenal tlarhnung a nghing a, tunah Saliba a lo kir leh ta chiah - Brazilian defender Gabriel a dam hma chuan an nih dan tur angin an nghet tawk thei rih lo, an mamawhna a sang hle.

North London club hian Premier League table chung ber dinhmun an luah chhunzawm a, nizan khan an hnuaia mi Manchester City an inlan ve thung - Pep Guardiola leh a naute hi chak pawh ni se Arsenal hi an umphak thei rih lo a ni.