Hmeichhe fight pahnih en a châkawm

Sailo Agencies - MIZBA Mega Boxing 2025-ah final zan khatnaah hian bout nga a awm dawn a, Aizawl South II MLA Lalchhuanthanga khuallian a ni ang. Inelna hi zanin dar 8:00 aṭangin R. Dengṭhuama Stadium, Mualpuiah ṭan a ni ang a, hmeichhe bout hmanga ṭan a ni dawn.

45-48 kg category aṭangin ṭan a ni dawn a, Lalngaihawmi leh Lalbiaknii ten bul an ṭan dawn. Angaihi hi unaua final lut thei an ni a, a laizawn Vanlalringngheti'n zan hnihnaah 51-54 kg category-ah final a khel ang.

New Serchhip nula Angaihi leh Kolasib nula Biaknii te hi SAI-ah an awm ho tawh a, Biaknii a senior zawk ni mah se Angaihi nen an thiam dan a inang tawk hle. Biaknii hi Mizo mipa boxer F. Zoramchhana hnuaiah TD Academy-ah training a nei mek.

48-51 kg category-ah TC Malsawmkimi leh Lalremsiami (Bawihi) te an inhnek dawn. North Vanlaiphai nula TC-i hi NCOE, Guwahati-ah a inzir mek a, a vanglai a hmang chho mek. Lunglei Rahsi Veng nula Bawihi hi senior boxer a ni a, TC-i laka hnehna chang turin a tawnhriat hman ṭhat a pawimawh khawp ang.