Selhurst Park-ah Man United an chak

Premier League champion lai Liverpool tlawmna hmun Selhurst Park-ah Manchester United-in Crystal Palace 2-1 in hnehna an chang a, table-ah pasarihnaah an invawrhchho bakah an hmelma Reds chungah an awm chhunzawm. Ruben Amorim-a hote hian December 4, Ningani zan hian West Ham United an mikhual ang.

Pathianni zan inkhelah hian Man United-in Benjamin Sesko leh Matheus Cunha te an la chhawr thei lo a, Joshua Zirkzee leh Mason Mount tan hun ṭha an inher chhuak thung. Ṭan deuh chiahah Casemiro-a'n hnai tak aṭangin a hlah a, Bruno Fernandes freekick hmangin chance dang pawh nei mah se Amorim-a hote bul ṭan dan erawh a ṭha lo.

Eagles an insiam rem a, chance an nei mawlh mawlh. Minute 32-naah Jean-Philippe Mateta-a'n a penalty hlawhchhuah chu goal-a chantirah inngai mah se a ke vei lam a pet per avangin pawmsak a ni lo. Mahse, Mateta hian minute 36-naah penalty hi pet nawn lehin, chiang takin a khung a, 1-0 in hma an hruai ta tho.

Man United hian July 2020 hnuah Selhurst Park-ah hnehna an chang tawh lo a, January 2023 hnuah goal an khung tawh lo. Palace khelmualah record nei ṭha lo mah se second half-ah Amorim-a hote an tho chhuak.

Minute 54-naah angle awm mang lo aṭangin Zirkzee-a'n a khung a, minute 63-naah Mount-a'n freekick aṭangin a khung leh bawk. United tlarhnung a phui chhunzawm a, point thum hmuh an harsatna hmunah an chak. Chelsea aṭanga Old Trafford pantu Mount-a'n theihna a nei tih a pholang a, Zirkzee pawh Sesko nena inel chho turah a ngaih theih. Lisandro Martinez a dam tawh a, hun tawp lamah a rawn lut - Man United tan lawmna tur hlir a ni.