Silly Point: India Khotom
Sub Continent-a result nei ṭha ngai meuh lo New Zealand leh South Africa ten kum khat chhungin India ramah Test Series-ah hnehna an rawn chang thei a. A ni, hnehna satliah a ni mai lo a, a sawpin India an sawp a. Mahni rama Test khelh chuan sakeibaknei an tih ṭhin India hi Gautam Gambhir a hnuaiah ICU-ah an awm mek!
Chhuichianna
Spinner-te tan a ni khatna aṭanga ball sawt kawi nghak thei pitch hmanga innghah hi khandaih hriam tawn ang a ni a. A fuh chuan ṭha lutuk, mahse mahni insah tel theihna a ni lawi. Kolkata, Eden Garden lamah India-in spinner paliin khel mah se, thumvawrah chak miau lo a, a bat hnuhnung zawkah an ṭang dawn tih hriat a nih kha chuan, time bomb chungah an ṭhu tih a chiang nghal.
Tin, tunhma ang a ni tawh lo a, ram dang hian spinner ṭha an nei ve vek tawh. A vawtuin ek a cheh ta ngei a. Proteas spinner Simon Hermer leh 6ft 10in-a sang pacer Marco Jensen-ten 'good length area' aṭangin ball mak tak takin an sawh tir tawh mai si. India dawl zawrin an zawr.
Ṭahna ruam Guwahati
Guwahati lamah pitch pangngai buatsaih a ni a. Amaherawhchu musical chair anga player-te inthlakkual sek ṭhat lohzia a lo lang a. Mei kawh vah chunga hnehna chang hlim South Africa ṭhumvawra an han vannei leh nen. India Test team hi dinhmun ṭha lo zetah tunah chuan a ding mek a ni.
A chhan
Ni nga awh Test Cricket Multi Day) kan tih hi chu specialist-te khelhna tur a ni a. Bat thei deuh reuh, vawm thei deuh reuhte tan hmun a awm meuh lo. Gautam Gambhir-a'n all rounder a ngaih pawimawh luatah India team-in lei rem a rap thei meuh lo.
Hemi hma lawk hian Ranji Trophy chungchang kan thailang tawh a, chutah chuan kumina Mizoram team te round hnuhnung ber thlengin final lut thei dinhmunah an ding. Ranji Trophy hi ni li chhung khelh niin multi day a ni a, Test cricket nen a kalhmang a inang.
Test Cricket-ah chuan batsman paruk a ṭha ber an khel ang a, wicket keeper hi batsman ṭha an nih chuan vanneihna. India team-in Rishab Pant an nei hi an vannei hle. Chutiang bawkin Mizoram team-in Jehu Anderson te ang an kawl hi bonus a ni tawp mai ni.
Bowler ṭha ber wicket 20 la thei pali khel lehin. Hmun khat ruak hi team mamawh a zir leh pitch a zirin batting emaw bowling all rounder hman hi a him ber a, a lo la tha ber bawk. Bat deuh reuh, bowler ni ve tho deuh reuh Ravindra Jadeja, Axar Patel, Washington Sunder, Nitish Reddy te an luh rual ṭhawt tir hi a tak ramah chuan India chetchhiatna a ni ta reng a ni.
Kumthar August 2026 hma chu India team hian Test an khel tawh hrih dawn lo a. Ball var cricket lamah tal hlimna min thlen turah ngai ang!
Pune Khawpui lamah
Ranji Trophy-ah uiawm takin final lut zo ta lo Mizo tlangval te, tha thar nen Pune lamah T20 khel turin an inkulh leh nghal a. Helam chu kan thailang nawn tawh lo ang a. Amaherawhchu Mizoram team hi tun ang zela hma a sawn chuan Plate group an chhuahsan ve hun hi a hla tawh lo tih sawilawk tur hian zawlnei nih kher a ngai lo.
Syed Mustaq Ali lamah tui let hnuah a tum khatna atan Nagaland hnehin bul an ṭan a. Professional Cricket-a Mizoramin Nagaland an hneh ṭum khatna a ni.
Kum dang zawng aiin Mizo tlangvalten inrintawkna an ngah chho a, khelmualah a rah a rawn lang ta reng. North East Cricket arsi lian tia chhal ngam, Nagaland captain Jonathan Rongsen-a meuhin inkhel zawhah min titi pui a. Jonathan chuan, "Mizoram team danglam leh thar hlak kan hmu. Kan zuam ang ngawtin ni tawh lo. Team ṭha zawkin chak tih ka pawm. In association-in Maharashtra player ṭhate nena inkhelh tirna chang an hria a, in hlawk pui tih a lang," tiin min hrilh a, Mizoram Cricket a fak derna anka hian thui tak a sawi awm e.
Bul ṭan chauh an la ni a, zinkawng thui tak a la awm. Amaherawhchu India cricket legend leh Nagaland coach Debashish Mohanty chuan,"Mizoram team-te an star batsman Jaffer a khel thei lo chunga, Mizo tlangval tin mai an hna an rawn thawk chhuak leh, in fielding hmuhnawm lutuk kha kan inan lohna a ni. Ka Naga tlangval-te fuih nan ka hman ve tur a ni e," tia a fak derna anka hian ka khar phawt a nge.
Mizoram vul zel rawh se.