Mizoramin Nagaland an hneh

India rama cricket thuneitu sang - Board of Control for Cricket in India (BCCI) hnuaiah inelna hoah Mizoram chuan result duhawm a nei chhunzawm zel. T20 inelna, Syed Mustaq Ali Trophy-ah Mizoram chuan match hmasa berah Nagaland chu run 16-in an hneh.

Nilaini khan Deccan Gymkhana Cricket Ground, Pune-ah team pahnih hi intawngin, ṭhum vawrah Nagaland vannei zawkin vawm hmasak an thlang.

Mizoram-in over 20 chhunga run 198 siamin wicket ruk an hloh a, Mizoram tan KC Cariappa (Outstation) chuan run 48 (23) a siam a. Dawrpui Vengthar tlangval Jehu Anderson chuan run 41 (23) siamin Sahil Sharma (Ṭhuampui) chuan run 36 (27) a siam bawk.

Captain Joseph Lalthankhuma'n run 33 (18) siamin K. Vanrotlinga (19*) leh F. Vanlalmuanzuala (11*) te'n an rawn thawh ṭha hle bawk, anni pathum hi Ramhlun Venglaia cheng vek an ni.

2nd Innings-ah Nagaland lamin over 20 chhungin run 182 tlin wicket kua an hloh a. Mizoram tan batting lama che ṭha KC Cariappa chuan wicket thum lain, K. Vanrotlinga leh TC Vanlalremruata (Thingsulthliah) te'n wicket hnih ve ve an la. Karthik CA (Outstation) leh Sumit Lama (Bungkawn Vengthar) te'n wicket khat ve ve an la bawk.

Mizoram hian an match hnihna atan November 28, Zirtawpni hian Sikkim an hmachawn leh ang.