FIFA World Cup 2026-ah seeded team dah hrang dawn

FIFA World Cup-ah seeded team an awm ṭhin a, mahse semifinal thlenga dah hran an ni lo. Nakkuma inelna neih turah erawh seeded pali Spain (1), Argentina (2), France (3) leh England (4) an awm dawn. Heng team palite hi semifinal-ah chauh an inhmachhawn thei ang.

Thomas Tuchel-a kaihhruai England chu seeded palinaah an dah a, seeded pakhatna Spain emaw pahnihna Argentina chu semifinal-ah chauh an hmachhawn thei dawn. Three Lions hian final-ah chauh 2018 champion France an hmachhawn thei ang. Chutihrualin seeded nihna hmang ṭangkai tur chuan an group awmna ṭheuhah pakhatna an nih a ngai thung.

FIFA chuan, "Seeded team siam hian inelna tluanin inelna a tih nun phah ang. Team pali hi anmahni group ṭheuha pakhatna an nih chuan semifinal-ah chauh an inhmachhawn thei ang," tiin an puang.

World Cup-ah khawmualpui pakhata ramte chu group stage-a awm kawp lo tur a ni a, hetah hian Europe ram bik erawh a huam lo. Europe ram hian team 16 zet an thawh a, group awm tur zat 12 aia a tam avangin anni erawh a huam ve lo a, group khatah pahnih aia tam an kawp thei lo thung.

Hei vang hian England chu Scotland nen pawh group khatah an awm kawp thei a, Wales leh Northern Ireland te pawhin playoff an paltlang a nih chuan Three Lions nen awm kawp theih dan a awm.

FIFA chuan a tling tawh ram 42 chu pot paliah a ṭhenhrang a, playoff a tling tur ram paruk pawh pot 4-ah a dah. Pot khata awm ramte hi an awm kawp thei lo. December 6, Inrinniah draw hi neih tur a ni a, hemi zawh hian an inkhelh hun tur puan a ni chauh dawn. Inkhel hmuhnawm tur chu mipui en tam theihna turah dah a ni ang.

Pot ṭhen dan

Pot 1 : United States, Mexico, Canada, Spain, Argentina, France, England, Portugal, Brazil, Netherlands, Belgium, Germany

Pot 2 : Croatia, Morocco, Colombia, Uruguay, Switzerland, Japan, Senegal, Iran, South Korea, Ecuador, Austria, Australia

Pot 3 : Panama, Norway, Egypt, Algeria, Scotland, Paraguay, Ivory Coast, Tunisia, Uzbekistan, Qatar, Saudi Arabia, South Africa

Pot 4 : Jordan, Cape Verde, Ghana, Curacao, Haiti, New Zealand, Uefa PO 1, Uefa PO 2, Uefa PO 3, Uefa PO 4, Confed PO 1, Confed PO 2