Paris-ah goal a sur

Nilaini zan Champions League inkhelah goal a sur a, Tottenham Hotspur-in champion lai Paris Saint-Germain lakah goal thum khung mah se, an lamah goal nga a luh thung avangin an chak zo lo.

Paris khawpuia inkhelah Spurs-in vawi hnih ngawt hma an hruai a, minute 35-naah Richarlison chuan goal hmahruai a khung - London club-in bul an ṭan ṭha a, goal khung an phu.

Mahse, mualneitu PSG nawr let a na a, Vitinha chuan minute 45-naah ṭha zetin si phurh sutna goal a khung - keeper Guglielmo Vicario tan tih theih a awm lo.

1-1 in chawlhlawk hman a ni a, Spurs bawkin hma an hruai nawn. Minute 50-naah PSG aṭanga Spurs-a loan-a khel mek Randal Kolo Muani chuan hmahruai nawnna goal a khung a, PSG an hawihai.

Mahse, treble champion an ni miau a, PSG an beidawng lo. Vitinha chuan minute thum hnu lawkah si phurh a sut a, midfielder Fabian Ruiz leh Willian Pacho ten goal khung zuiin, 4-2 a ni der!

London club-in Kolo Muani hmangin goal khung ve leh mah se, Vitinha vul zan Spurs-in an tawng a, minute 76-naah Cristian Romero handball vanga penalty chu Portuguese midfielder hian goal-ah chantirin, hattrick a siam.

PSG left back Lucas Hernandez chu Xavi Simons laka a foul avangin hnawhchhuah ni mah se, hun pek belh a ni tawh a, Spurs-in an chhawr hman tawh lo a, an tlawm.

Spurs hi inelna hrang hranga an match hnuhnung paliah vawi thum an tlawmna niin, chak an nei lo. UCL bikah an vawi khat tlawmna ni mah se, last 16 emaw playoff emaw pawh khel lo thei dinhmunah an ding.

London club hian PSG laka an tlawm hma hian Villarreal (1-0) leh Copenhagen (4-0) in an hneh tawh a, Bodø/Glimt (2-2) leh AS Monaco (0-0) an draw thung - Slavia Prague, Borussia Dortmund leh Eintracht Frankfurt an la tawng dawn.

Spurs hi team 36 inelnaah 16-na an ni mek a, an hneh loh tak PSG erawh pahnihna an ni. Season hmasaa playoff hmanga last 16 lut hram a, champion ta French club hian match nga an khelhah vawi li hnehna an chang tawh.

Luis Enrique naute hian Spurs an hneh hma hian Bayern Munich (2-1) ngam lo mah se, Atalanta (4-0), Barcelona (2-1) leh Bayer Leverkusen (7-2) an hneh tawh a, Athletic Bilbao, Sporting Lisbon leh Newcastle United la hmabakin, knockout round an luh ngei a rinawm.