Dinmawia a inlan dawn ta

Sailo Agencies-MIZBA Mega Boxing 2025 zanin 12-naah Mizo boxer ṭha Laldinmawia a inlan dawn. Tuipui tlangval Dinmawia hi 50-55 kg category-ah a tel a, a khingpui tur chu New Hruaikawn tlangval Zomuanpuia a ni.

Dinmawia hian Senior National Boxing C'ship-ah Mizoram tan silver medal a la tawh a, Mizo mipa boxer zingah gold medal la an la awm lo. Tuipui boxer hian sub junior, junior leh youth-ah chuan national level-ah gold panga a la tawh. Senior level chhiar telin silver pahnih leh bronze pakhat a hnek chhuak tawh bawk.

India aiawh pawhin Dinmawia hi a feh chhuak tawh a; Ukraine (gold)), Serbia (silver), Uzbekistan(silver) leh Kazakhstan (bronze) ah te medal a la tawh. Mizoram chhunga Dinmawia hian ama weight a thunun ṭhin a, Services-a a luh hma hian 2011 LPS Profight (52 kg), 2012 Mizoram Contender Fight (52 kg - light fly weight) leh 2023 Mizoram Fight Night (56 kg - Bantam weight) ah te a champion tawh a ni.

Inelna hi R. Dengṭhuama Indoor Stadium, Mualpuiah neih a ni a; Zonet Rihnim, Empai leh YouTube hmangin a en theih a, a hmuna inhnek en man en duh tan mi pakhatah Rs 50 chauh a ni.