MIZBA Mega Boxing-ah a ruh no an chhuak zel

Mizoram Boxing Association (MIZBA) buatsaih Sailo Agencies-MIZBA Mega Boxing 2025 chu R. Dengṭhuama Indoor Stadium, Mualpuiah khelh chhunzawm zel a ni. November 26, Nilaini zan khan a zan 10-na neih a ni a, inelna pawh a hmuhnawm chho hle.

Bout hmasa berah Tuipui boxer Nicky Zothanpuia'n split decision-in hnehna a chang a, kum 18 mi chauh a la ni. BVT tlangval Reuben Lalrimawia'n unanimous decision-in Lalruatfela a hneh a, Reuben hi MSSC (Hawla Indoor Stadium) a training mek a ni.

Niawhtlang tlangval Lalchhuanpuia'n harsatna nei loin Zakaria Lalneihpuia a hneh a, hmabak erawh a harsa dawn. An category-a seeded no. 1-a chhal theih Tuipui tlangval Zorammuana a hmachhawn dawn.

Hmeichhe inhnek pakhat a awm a, tawnhriat nei ṭha zawk Lawngtlai nula Rudy Lalhmingmuani'n Rebecca Lalfakawmi lakah hnehna a chang. Rudy hi international level thlenga tawnhriat nei tawh a ni.

Kum 28 mi H. Lallawmawma'n Rothantluanga a hneh a, Lawngtlai tlangval Lawmawma hi Boxing by Rick-ah training neiin state level-ah silver pariat leh bronze pathum a hnek chhuak tawh.

Kum 18 mi Lalrambuatsaiha pawhin National C'ship khelh tumin kawng dik a zawh mek a, unanimous decision-in TC Vanlalthlamuana a hneh.

ITI Veng tlangval Vanlalchhuanawma'n split decision-in BVT tlangval David Lalsangzuala a hneh. Chhuanawma hian Mizoram aiawhin vawi li a chhuak tawh a, state level-ah pawh gold pariat, silver pahnih leh bronze pakhat la tawhin best challenger leh best boxer-ah ṭum hnih ve ve thlan a ni tawh bawk.

Kum 16 mi chauh Lalmalsawmkima'n Electric Veng tlangval Rohit Kumar chu harsatna nei loin a hneh a, kum lamah Lalmalsawmkima hi naupang deuh mah se state chhung inelnaah gold vawi nga a la tawhin Nilaini zanah fighter of the night-ah an thlang.

Bout tawp berah Seling tlangval Zoremsiama'n Buangremsanga unanimous decision-in a hneh. Kum 28 mi Zoremsiama hi Seling Fitness Centre-a training nei lai a ni a, Pro Fight 2024-ah semifinal a lut.