Arteta a inringtawk

Arsenal hian season kal laiah match khat chiah chak loh an la nei, player hliam an ngah lai pawhin result an nei ṭha chhunzawm zel - coach Mikel Arteta pawh a inringtawk a, a naute chungah rinna a nghat ngam bawk.

Gunners manager Arteta chuan, "A hmasa berah chuan ka naute hian fak an phu. Team ṭha lakah hnehna chan phu khawpin an khel chhuak a, ka hmuh dan chuan Europe a team ṭha ber an ni hial ang.

"Zanriah tui takin kan ei a nga, chumi hnuah chuan Chelsea nen kan inkhelh tur kan ngaihtuah chhunzawm chauh ang," a ti. Stamford Bridge an tlawh tur hi a pawimawh, an chak thei a nih chuan Premier League champion an beiseina a sang zual dawn a ni.

Player of the match atana thlan tak Declan Rice pawhin beisei a nei sang, kum 2020 hnua a vawi khat nan nomawi chawi ngei an tum. Rice chuan, "Bayern Munich hi team ṭha an ni, kumina an hneh tawh team hrang hrang hi en ila, an ṭhatzia a chiang.

"Season hmasa aiin nasa takin hma kan sawn tawh a, khelmual chhungah inkhelh chauh ni loin hruaitu ṭha tak tak kan nei, chuvangin team ṭha zawk kan ni tawh. Kan tun kan hlen tihna erawh a la ni lo, hlenchhuah tur tam tak kan la nei," tiin a sawi.

Hliam vangin Viktor Gyokeres, Kai Havertz leh Gabriel Jesus te an la chhawr thei lo a, striker ṭha pathum awm loh kara goal khung dan an hriat avangin an buai rih lo, chutihrualin ngaihṭha leh thlamuang taka awm erawh a la remchang bik lo.