Tlai dar 2:00-ah Neroca Vs Aizawl FC

Vawiin tlai dar 2:00 hian Aizawl FC chuan Khuman Lampak Main Stadium, Imphal-ah Neroca an hmachhawn dawn. Mizo club hian tun season I League match hmasa berah Mohun Bagan an chelh a, point khat hlu tak an hlawh chhuak.

Aizawl FC coach Standly Rosario chuan, "Neroca lakah hian point thum hlawhchhuah kan tum. Manipur club hian an match hmasa berah Gokulam Kerala an hneh lo a, keini pawhin kan hneh theih ngei kan inring," tiin Vanglaini a hrilh.

Neroca hian coach hlui leh Aizawl FC coach hlui ni bawk Gift Raikhan an la let a, hemi chungchang hi sawiin Standly Rosario chuan, "Gift hian Aizawl FC a hrechiang a, ka player-te theihna pawh a hre dawn. Hei vang hian kan fimkhur a ṭul dawn," tiin a sawi.

Aizawl FC hian Bagan an hmachhawn ṭumin Alfred Kemah Jaryan leh Richard Kassaga chiah an kawl a, tun ṭumah hian Malian forward Abdoulye Kanoute an nei tawh. Standly chuan, "Kanoute training kan hmu tawh a, kan chhawr nghal ang. Chutihrualin Isak leh Chhara ten hliam tenau an nei a, an dinhmun tur ka hre lo," tiin Vanglaini a hrilh a, MPL semifinal khelh tel ngai chuan I League-a an match a puih loh thu a sawi tel bawk.