Cunha a inhliam! Zaninah United vs Everton

Manchester United-in hliam vangin Benjamin Sesko an chân tawh a, AFCON khel tur player pathum Bryan Mbeumo, Amad Diallo leh Noussair Mazraoui te an chân dawn. Ruben Amorim tan chanchin ṭha lo dang a awm belh a, Brazilian forward Matheus Cunha a inhliam leh bawk.

United hian zanin dar 1:30 hian Old Trafford-ah Everton an mikhual dawn a, Cunha a khel thei lo a nih chuan Amorim-a'n squad a siksawi ve viau a ṭul dawn. Red Devils hi Premier League-ah point 18 hmuin 10-naah an awm mek a, an chak a nih erawh chuan a sang pali zingah an awm chho thei dawn thung.

Cunha a inhliam

Inrinni khan Man United forward Cunha leh English actor Sam Aston te chu Coronation Street-ah intih hlimna hun hmang tur an ni a, mah se a buatsaihtu Visit Altrincham chuan Facebook kaltlangin training-naa chetsual vangin Cunha tel theih theih loh tur an puang.

Man United lamin Cunha inhliam chungchang hi an puangzar lo a, Everton nen a inlan theih leh theih loh tur thu pawh nimin tlai thleng kha chuan thu chiang a la awm lo. Chutihrualin Brazilian forward hi hliam na tak niin a lang lo a, Toffees nen erawh khel lo thei dinhmunah a ding thung.

Kumin nipui khan Cunha hian £62.5mtd-in Wolves aṭangin Old Trafford hi a pan a, Amorim-a hnuaiah player pawimawh a ni. October thlaa Brighton 4-2 a an hneh ṭumin club tana a goal hmasa ber a khung a, international break-ah pawh Brazil tan match hnihah a inlan ve ve. Everton laka a khel thei lo a nih chuan Amorim-a tan chânna nasa tak a ni thei ang.

Khel thei lo ta se?

Zirtawpni khan Amorim-a'n press conference a ko a, striker Benjamin Sesko chu December thla laihawl thleng a khelh theih loh tur thu a sawi. Cunha a khelh theih loh leh zel chuan Amorim-a tan squad siksawi nasat a ṭul dawn.

Cunha thlak thei tur bera lang chu Mason Mount a ni a, chutihrualin Kobbie Mainoo leh Joshua Zirkzee te pawh a vawi khat nan tun season Premier League-ah bul an ṭan thei bawk.

Kum 18 mi Shea Lacey pawh United tan Premier League 2-ah a che ṭha a, England Under 20 tana khel tawh niin, Liverpool-a piang English winger hi squad-a awm thei dinhmunah a ding.

Engtin zel?

Sesko bakah Harry Maguire ten Everton an hmachhawn thei lo chiang a, chutihrualin table-a 13-na lakah point thum an hlawhchhuah ngei a ṭul. Amorim chuan, "Kan team khelh tawhna thlir ula, eng team mah hi an awlsam lo. Premier League-ah chuan team hi table-a an awmna aṭanga teh chi an ni lo," tiin Everton laka chetsual theih a nih thu a sawi.

Tun hnaia an khelh dan sawi zuiin Portuguese manager chuan, "Man United ka enkawl tirh ai chuan inkhel kan thunun tawh zawk a, kan khel ṭha tawh zawk. Kawng hrang hranga team dang kan el pha bawk," tiin hmasawnna a awm thu sawi.

Man United hian October thlaa an khingpui Sunderland, Liverpool leh Brighton te an hneh vek hnuah November-ah chak an la nei lo a, chak loh pawh an nei chuang lo. Amorim-a hote hian match hnuhnung pahnihah Nottingham Forest leh Tottenham Hotspur te hmachhawnin an inhnehtawk ve ve.

A êng zawnga thlir chuan Man United-in match nga chhung chak loh an nei tawh lo a, Amorim-a hnuaiah hmasawnna hmuh tur a awm. An khingpui tur Everton hian match thum chhung chak hmel an hmuh loh hnuah match hnuhnung berah Fulham 2-0 in an hneh a, inrintawkna an neih phah sawt ang.